Jak Sau Taw Nga Ai Masa Hta Putao Ginra Masha Ni Hkauna Bungli Shang Na Matu Yak Hkak Nga

Pajau Media Channel

23rd April, 2024

Gasat gala majan masa a majaw Myitkyina-Putao hkrun lam pat da ai shata lahkawng daram na wa sai hte gunrai htaw shalai ai lam mung tsep kawp hkring mat ai re majaw Putao ginra hta jak sau taw nga ai masa hta hkauna galaw sha mung masha ni gaw bungli shang na matu yak hkak nga ai hte myit ru myit tsang nga ma ai re hpe chye lu ai.

Putao ginra masha ni gaw hkauna galaw ai lam hpe madung tawn nna kan bau nga ai ginra langai mung re hte lai wa sai 2023 shaning shawng daw de gaw hkauna bungli galaw ai hta nga, dumsu ni hpe jai lang nna galaw sha ai ladat hpe ji woi ji wa prat ban hte ban galaw hkrat wa ai re. Ndai hpang daw de prat madang hta hkan nna na htu jak ni hpe malawng jai lang nna galaw wa ai re hpe mung chye lu ai.

Na htu jak hpe malawng jai lang wa ai hpang kaw nna dumsu, nga u loi ni hte hkau na htu ai lam gaw n nga ai daram rai sai re. Ndai masa kata Putao ginra maga de lai wa sai March ( ya kawn byin ai Sumpra Bum majan hpang hkrun lam pat mat ai shata lahkawng daram na wa sai sha n-ga Putao ginra hta jak sau tsep kawp taw mat sai majaw hkauna galaw sha ai mung masha ni hkauna galaw sha ten du wa sai raitim hkauna bungli shang hpang na matu grai yak hkak nga sai re.

“Shawoi shaning gaw April shata htum maga kaw na hkauna htu hpang sai. May shata daram kaw na gaw na bra gat hpang sai. Ya gaw jak sau n nga ai re majaw kadai mung hkauna bungli n hpang shi ai. Mawdaw hkrun lam bai hpaw na hpe sha la nga ai. Lanam shang ai aten du hkra mawdaw hkrun lam n hpaw yang gaw Putao ginra ting gaw grai yak hkak mat na masa nga ai” nga nna hkauna galaw sha mung masha langai tsun ai.

Putao ginra kata hkauna htu ai kaw Nga, Dumsu ni n lang mat ai masa hte seng nna Putao ginra mahsa matut tsun dan ai hta, “Moi lai wa sai shaning 10 ning daram du hkra gaw hkauna galaw ai ni gaw Nga, Dumsu ni hpe sha shangun sha ai. Prat masa hta hkan na gau ngwi ngwi jak kaji ni chye lang wa ai hpang kaw na gau ngwi ngwi Nga, Dumsu ni hpe n jai lang wa ai re. Nga, Dumsu ni n lang sai re nga yang gaw yawng hpe wang lu wang lang dat kau sai re majaw bai shani la na shangun sha na matu grai yak mat sai. Yawng zai ma sai. Hkauna htu ai kaw jai lang mai ai madang de du hkra grai sharin la ra sai. Aten gadun laman chye hkra shaman ya na matu mung grai yak sai. Gara hku mung n mai byin ai. Ndai masa hta Putao ginra na hkauna galaw sha ai mung masha ni grai myit tsang nga ma ai re. Hkau na n lu galaw ai rai yang Putao ginra gaw grai yak hkak wa mai ai,” nga nna tsun dan ai .

Ya na mung masa lapran Putao ginra kata na ginwang 5 kata nga mung masha 300,000 daram gaw hkawm sa hkawm wa hkrun lam pat nga ai hte gunrai manu ni ladu lai tsaw lung wa ai hta sha n-gu jak sau taw ai hte ginra kata gaw gap magam bungli hta jai lang ai gunrai ni taw ai masa lam ni hta grai yak hkak nga ma ai re. Ndai masa hta ya aten ginra masha ni myit ru myit tsang hpa lam law law hkrum katut nga ai lam tsun garu nga ma ai re. Ya aten Putao ginwang kata nga Machyang Baw, Nawng Mung, Hkawng Lang Hpu hte Sumpra Bum ginra kata jak sau, Diesel manu ni Karlan mi kaw lap (80,000) daram du hkra manu ni tsaw nga ai hte ya aten dut ya ai seng pyi n nga ai daram she rai sai lam chye lu ai.

Shiga - Mali Hku