January Praw 1 Kaw Nna May 21 Ya Du Hkra Myen Mungdan Kata Myen Hpyen Dap Dingsa Ai A Majaw Jawng Ma Ni Hte Hpaji Sharin Ya Ai Sara/num Si Sum Ai Jahpan

Pajau Media

May 22, 2025

January praw 1 kaw nna May 21 ya du hkra Myen mungdan kata Myen hpyen dap dingsa ai majaw jawng ma ni hte hpaji sharin ya ai sara/num marai (50) asak si sum nna asak 18 ning n pu ma marai (38) lawm ai lam AAPP n dau da ai re.

Dai asak si sum mat ai ni kaw amyu shayi (31) hte asak 18 ning n pu la marai (18) lawm ai hte n bungli gap ai majaw asak si sum ai marai (40), lak nak aba a majaw marai (4) re lam tang madun da ai re.

BNI-Myanmar Peace Monitor a matsing ningting hta April 23 kaw nna May 6 ya du hkra bat lahkawng laman Jinghpaw mung hta mung masha marai (3) si sum nna nbungli gap gasat mabyin (1) nga ai hte gasat gala majan (11) lang byin ai lam tsun da ai re.

Myen mungdan madang hku rai yang Jinghpaw mung kaw gasat gala majan byin shadang law dik rai nna Myen hpyen dap lak nak kaba gap ai lam, mung masha dum nta wan nat jahten ai lam ni a majaw ginra masha 1,000 jan hpyen koi yen ra ai lam chye lu ai.

Myen hpyen dap a nbungli gap gasat ai lam n hkring dingsa Myen mungdan kata nga ai hpaji jawng ni, makam masham nawku jawng ni, hpyen yen dabang ni hte tsi rung tsi gawk ni gaw Myen hpyen dap masat shingte tawn htim gasat ai shara ni tai wa sai nga nna BNI tsun madi madun da ai kaw na chye lu ai.

Shiga- Htu Seng