Jawng Ma 1000 Jan A Matu Hkam Ja Lam Tsi Mawan Hkyak Hkyak Ra Kadawn Nga Ai Lam

Pajau Media

August 5.2025

Ginjaw Ginra kata August 4 Ya jahpawt daw Bum Hka Tung kaba wa ai majaw Mung masha dum n ta law law hten hkrum mat ai sha n-ga Alen Bum Hpaji Jawng a Tsi Gawk mung hka maw ru Hkrum sha ai majaw Jawng Ma 1000 jan a matu hkyak hkyak tsi mawan garum ningtum ra nga ai lam chye lu ai.

Alen Bum Hpaji Jawng hta laning hte laning jawng ma law wa ai majaw Kpict kaw nna garum ai hte 2022 ning hta tsi gawk gaw gap da ya ai re.

 Shanglawt Asuya hku nna mung asuya Tsi magam gun marai (2) san da ya ai hte Child Dream garum hpung ni mung tsi mawan loi li madi shadaw ai rai nna Ma ni a hkam ja lam a matu Jawng hku na mung atsam dat let galaw nga ai masa hta Hka hpyen hkrum ai re lam Alen Bum Jawng Sara langai tsun ai.

"Alen Bum jawng kaw tsi gawk nga nan nga ra ai majaw Kpict kaw na garum jaw ai hte gap da ai re, Tsi gawk kaw yu na tsi sara Num lahkawng hpe Asuya Tsi magam gun kaw nna sa ya ai, Tsi mawan Hpe gaw shata shagu Child dream ni hku nna garum ai lam gaw nga ai tim n law ai majaw madung gaw Jawng kaw na sha law malawng lit re, Hka Hpyen a majaw mari da ai Tsi ni yawng lawm mat sai, Dai majaw ya aten hkyak hkyak tsi mawan garum ningtim ra nga ga ai" nga nna Alen Bum Jawng Sara langai tsun ai re.

Alen Bum Jawng hta gaw Myo mare kaba de jawng sa lung na matu yak hkak ai hpyen yen jawng ma ni a matu yaw shada let hpaw da ai jawng langai re .

Shawng daw hta gaw Jarit mayan hkan na hpyen yen Mung masha ni law malawng lung ai jawng langai re hpe mung chye lu ai. Myen mungdan uphkang masa galai wa ai hpang kaw nna gaw Myen mungdan shara shagu hkan na jawng ma ni mung sa lung ma ai re.

2025 -2026 hpaji ladaw hta gaw Jawng ma 1355 hpaji sharin hkam la nga ai Jawng kaba langai re. Ya aten Alen Bum Jawng a matu hkyak hkyak Tsi mawan garum ningtum ra kadawn nga ai re hpe mung chye lu ai.

Dai sha N-ga hka hpyen tsin yam hkrum sha nga ai Mung Seng Yang, Ja Htu Kawng, Je yang Hpyen yen dabang, Hpun Lum Yang, Sut Mu Awng hkan na Mung masha ni mung Yup ra Hpun N ba hte Dum n ta lang na arung arai kaw na hkawt garum ning tum ra kadawn nga ma ai lam mung chye lu ai.

Shiga Pyilan U