Jinghpaw Mung Daw Kata Pat Tawn Da Ai Wifi Line Ni Yawng Bai Hpaw Ya Sai Lam

Pajau Media Channel

Myen mungdan masa lam grai laja wa ai hpang kaw nna mungdan kata phone Internet line ni hpaw dat pat dat rai atsawm n lu lang ai shata masum hkawt rai wa sai re hte 2024 January (15) ya kaw nna pat tawn da ai wifi line ni yawng bai hpaw ya sai re.

Ya na zawn Internet line pat tawn da ai lam hte seng nna lit nga ai ni kawn tsun da ai hta gasat gala majan a majaw Internet sumri ni hten hkrum ai, lawan ladan gram sharai na matu mung majan sawng ai majaw n lu galaw ai mayak ni a majaw re lam tsun da ai re. Internet n lu mat ai hpang Mung shawa ni yawng grai yak hkak ginchyum chyat mat ai sha n-ga grau nna gaw Online hte shang gumhpraw tam lu tam sha nga ai ni sum machyi ai lam ni law law byin hkrum mat ai re.

“Line nlu mat ai hpang Mobile internet hte bungli galaw grai yak mat wa ai, gumhpraw lap 1,000 mi na nga yang data 450 Mb sha lu ai kaw line bai n kaja gayin hkrai gayin, ph gumhpraw ma ai sha malawng ai, ya Wifi line bai lu sai nga yang gaw bungli grau masan sa sai” Online kaw nna gat dut ai magam bungli galaw nga ai mung masha langai tsun da ai re.

Myen mungdan kaw nna asak ram ai ni law malawng gaw Mungdan masa lam a majaw maigan mungdan de bungli galaw let nta de madi shadaw ai masha law wa ai re, raitim mungdan kata Internet line ni pat kau ya ai majaw matut mahkai hkrum shaga lam ni mung grai yak hkak mat ai, Jinghpaw mungdaw kata majan sawng ai majaw internet nlu mat ai lam tsun da ai raitim Jinghpaw Mungdaw n htoi du wa ai hte lawu ga na Asuya hkringmang salang ni Jinghpaw mungdaw de sa du ai January praw ( ya shana daw de kaw nna wifi line n kau hpe bai hpaw ya ai mung re.

N dai masa hpe yu yang Myen asuya hpyen dap gaw internet line ni hpe shahte myit ra ai hku galaw ai masa byin nga ai lam Mung masha ni tsun garu ai lam ni mung nga ai re hpe chye lu ai.

Jinghpaw mung ginra kata Internet tsep kawp n lu mat ai gaw Dec (7) ya shani kaw nna rai sai re hte Jinghpaw mung kata ya na zawn internet atsawm nlu lang ai gaw shata lahkawng rai wa sai hte Dec (12) ya shana daw kaw nna gaw Atom Sim Card hpe Internet hte phone line bai hpaw ya sai raitim aten n tam nlu mat ai zawn re ai lam ni gaw dingyang byin nga ai re.

Jinghpaw Mung kata pat tawn da ai wifi internet line ni yawng January 15 ya kaw nna bai lu sai lam hpe mung chye lu ai.

Shiga – Bungshi