Jinghpaw Mung Dingdung Daw Ginra Na Wan Hkru Mat Ai Mare Gaw Gap Hpang Nga Sai Shiga

Lai wa sai November (7) ya jahpawt daw hta mare ting ngu daram wan hkru manghkang byin mat ai Jinghpaw mung dingdung daw ginra na Shing Hkawng Mare, bai gaw gap masing hpe Jinghpaw Mungdaw Asuya hte kaga shinggyim nau na garum hpung ni a garum ningtum hte gap hpang wa sai re lam chye lu ai.

Shing Hkawng mare na Wan hkru hkrum ai Mung masha ni a dum nta gaw gap masing hte seng nna Jinghpaw Mungdaw Hkringmang Daju hte Ausya hpung ni nan sa du nna Shing Hkawng mare bai gaw sharawt na matu gumhpraw Sen Lap (600) wa du garum ai lam, Putao ginwang kata nga ai shinggyim nau na garum ningtum hpung ni kawn mung Sen (178) garum jaw ai lam dai ginra hte ni nawn ai Putao ginra masha tsun ai.

“ lai wa sai bat lahkawng daram hta Jinghpaw Mung Daw Hkringmang daju sa du gawan nna Sen (600) sa garum jaw ai nga tsun ai , Putao Myo ginra kata na lahkawn la ai alu ni hte gaw gap hpang sai”

Shing Hkawng mare gaw Jinghpaw mung Dingdung daw Hkyen htat ai Miwa mung jarit mayan hta nga ai mare kahtawng langai mi re, dai mare kahtawng hta Mung shawa dum nta htinggaw (103) nga ai re hte nta (64) wan hkru lawm mat ai re hpe chye lu ai. Wan hkru n pawt hpe tup hkrak n lu tsun ai raitim Ginra masha ni tsun ai hta mare baw kaw nna madu n nga ai nta kawn shawng hkru hpang wa ai re nga nna tsun da ai re.

Ya na zawn wan hkru manghkang a majaw mung masha ni hta sum machyi ai lam ni law law byin nga ai re, Wan hkru sum machyi ai lam hpe tsun maram ai hta Sen Mun mi hkying mali jan manu nga ai lam mung tsun da ai re. Shing Hkawng mare gaw Miwa Gumsan Mungdan hte jarit matut nna sut hpaga chyai ai ginra langai re hpe mung chye lu ai. Ya aten n shung ladaw shang wa sai re majaw nshung ladaw lum Palawng hte kaga malu masha garum ningtum ni mung ra kadawn nga ai re lam shi sawk Mali hku tang madun da ai.