Jinghpaw Mung Ginra Kata Mytel Phone Line, Internet Bai Mai Lang Sai Lam

Pajau Media

July 7, 2025

Jinghpaw mung ginra hpyen masa grai shuk shanut wa ai hpang Ginra law malawng hta Phone, Internet matut mahkai lam ni pat kau ya ai laning mi hkawt na ai hpang Jinghpaw Mung shara n kau hta Mytel phone, Internet line bai hpaw ya sai lam chye lu ai.

Jinghpaw mung ginra Nammati, Mogawng, Monyin, Hopin ginra ni hta lai wa sai June hpang jahtum bat daram kaw nna Mytel Phone line hte internet bai lu wa ai re lam ginra masha langai tsun ai.

“ Nammati kaw gaw June 23 daram kaw nna Mytel Phone line lu sai nga gaw tsun ai, tim n htoi tup hkrak gaw bai n chye tsun sai” ginra masha n kau gaw Mytel gaw Myen hpyen dap madu ai Phone line re majaw shimlum lam n nga ai majaw lang na matu myit tsang ai lam ni nga ai re hpe mung chye lu ai.

“ Mogawng ginraa hta Mytel phone mai lang ai bat mi jan wa ai, Internet ni mung mai lang taw sai, mai lang ai nga tim VPN hte lang ra ai, ngut na VPN mung shata mi kaw 10,000 kaw nna 15,000 lapran jaw ra ai” nga nna mung ginra masha tsun da ai re.

Kaga Phone line ni gaw shara lata nna sha mai lang ai re majaw ya aten Mytel phone mai lang wa ai hpang kaw nna Jinghpaw mung ginra kata Mytel phone jai lang law wa ai re, law malawng gaw hkawm sa hkawm wa sut hpaga galaw ai masha ni lang law nga ai re hpe mung chye lu ai.

Ya aten Mandalay Myitkyina Lam kaba dingyang hkawm sa nga ai hkrun lam hkawm masha ni gaw Mytel Phone line hpe madung jai lang wa ai hte kaga Phone line hte matut mahkai n mai re majaw hkrun lam yak hkak ai masa hta matut mahkai lam n di na matu Myen hpye dap madu ai Mytel phone line jai lang nga ai masa re hpe mung chye lu ai.

Shiga – Htingnai