Jinghpaw Mung Hkringmang Daju Kawn Putao Ginra Masha Ni Jak Sau Manu Hkyem Sa Ai Hku Dut Jaw Na Lam Tsun Let Tau Hkrau Gumhpraw Hta Ai Lam Galaw Nga

Pajau Media Channel

9th May, 2024

Jak sau taw nna hkauna bungli n lu hpang shi ai Putao ginra masha ni hpe Jinghpaw mungdaw asuya hkringmang daju kawn jak sau hpe manu hkyem sa ai hku dut ya na lam tsun ai hpang lamu ga Eka kade ngu ai hpe jahpan hta da sai hte jak sau dut shabra ya ai lam n nga shi ai raitim gumhpraw tau hkrau hta ai lam ni galaw nga ai re nga nna ginra masha ni tsun ai.

April (30) ya shani Jinghpaw mungdaw hkringmang daju Hkyet Hting Nan kawn Putao de sa du gawan nna jak sau taw nga ai masa hpe hparan ya na matu jak sau hpe manu hkyem sa ai hku dut shabra na re lam tsun kau da ai hpang Myen hpyen dap madu ai n bungli Y8 hte jak sau ni hpe htaw shalai ai lam chye lu ai.

May shata praw kaw nna Putao ginwang kata nga mare kahtawng shara shagu de na hkauna galaw sha ai mung masha ni gaw hkauna lamu ga Eka Masan Pa ni hpe seng ang ai mare uphkang rung de jahpan bang ai lam ni galaw nna May ( ya kawn tau hkrau gumhpraw hta ai lam ni galaw hpang nga sai lam ginra masha ni tsun ai.

“Eka mi kaw jak sau galan (3) madang hte dut ya na nga shawng daw de tsun ai. Manu hkyem sa ai hku dut ya na zawn nga na ya gaw galan pung mi kaw mun mali hte tau hkrau gumhpraw bang shangun sai. Galoi shani kaw na htuk ya na gaw n chye ai. Shanhte gaw hkauna lamu ga Eka Masan Pa kaw na hte hkrak sha dut ya na re nga tsun ai Hkauna madu ai lam masan laika n lawm ai ni na matu gaw n lu sai” nga nna ginra masha langai tsun ai.

Ya aten Putao ginra na masa gaw lai wa sai ten na jak sau manu hta htam lahkawng jaw mari la ra ai masa byin nga ai raitim hkauna gaw n galaw sha n mai re majaw shakut nna mari la ra ai masa byin nga ai lam ginra masha langai matut tsun ai.

“Jak sau galan mi kaw mun mali hte Eka mi hta galan masum dut ya na ngu ai gaw kaja nga yang shawoi na manu hta htam lahkawng daram tsaw ai. Eka mi kaw galan masum ngu ai gaw n law ai. Eka mi hpe shangut la na matu yawm dik sau galan (5) daram ma ai. Shinggan kaw mari na matu mung dut ai masha pyi n nga ai. Ya gaw galan mi kaw mun matsat du hkra dut ya nga ai majaw hkauna galaw sha ai mung masha ni dai ning grai yak hkak jam jau sai ga re” nga nna Putao ginra masha langai tsun ai re.

Ya na zawn Myen hpyen dap kawn Putao ginra a matu jak sau ni hpe n bungli hkrun lam hku lani mi hta kalang daram htaw shalai nga ai rai nna Putao ginra ting hpe dut shabra lu hkra galaw na matu gaw grai yak nga ai re. Putao-Myitkyina mawdaw hkrun lam pat mat ai hpang ya aten du hkra rai yang shata lahkawng hpring sai re. Putao ginra kata ginwang (5) nga ai rai nna ya aten gunrai jak sau manu ni ladu lai manu tsaw nga ai hte grai taw nga sai re hpe mung chye lu ai.

Shiga – Mali Hku