Jinghpaw Mung Hpakant Ginra Hpe Bai Lu Zing La Hkra Myen Hpyen Dap Gaw Hpyen N Gun Kaba Hte Htu Shadut Nga

Pajau Media

June 18, 2025

Jinghpaw Mung Hpakant ginra hpe bai lu la hkra Myen hpyen dap gaw hpyen n-gun kaba hte htu shadut wa ai hpang May 27 ya kaw nna June 16 ya laman hta sha Hpakant ginra kata mung masha marai 31 asak si sum ai lam Myanmar Now shiga dap kawn tang madun da ai.

 Asak si sum ai hta Hpakant ginra mung masha marai 31 kaw Hpakant Muklum kata gasat gala majan laman asak si sum ai marai 23 asak si sum ai lam, kadai sat ai re n chye ai sha asak si hkrum ai marai 8 lawm ai sha n-ga Marai 18 gaw hkala sawng ai lam chye lu ai.

Myen hpyen dap hpung ni gaw Hpakant ginra hpe bai zing madu la lu hkra April 20 jan kaw nna Myen hpyen n-gun 600 daram hte Kamai lam dingyang hpyen n-gun htu shadut lung wa ai majaw KIA pawng hpawm hpung ni maga kaw nna Hpakant ginra hkrun lam hpe pat kau ai hpang May 27 ya kaw nna Hpakant ginra de htim gasat wa ai re.

Dai zawn sha Hpakant de lung wa ai Myen hpyen dap hpung ni gaw Hpakant Muklum sha n-ga mare kahtawng ni hte lung seng htu bungli shang nga ai ginra ni hkan du hkra mung masha hpe ninggang shatai nna masha rim sat ai lam, lak nak kaba gap bun ai lam, wan nat jahten ai lam ni hpe matut manoi galaw nga ai re hpe chye lu ai.

Ya aten KIA pawng hpawm hpung ni hte Myen hpyen dap lapran gasat gala majan laja nga dingyang re sha n-ga Myen hpyen dap kawn gap dat ai lak nak kaba a majaw mung masha ni shanu nga ai shara hkan wa hkat kapaw ai majaw shani shagu asak si sum ai re hpe mung chye lu ai.

Shiga – Hpring