Jinghpaw Mung Hta Shata Mi Laman Mung Masha Marai 19 Asak Si Sum Ai Lam

Pajau Media

October 17, 2025

Jinghpaw Mung kata Myen hpyen dap htim gasat ai majaw September shata laman Ma marai 6 mung lawm yang Mung masha marai 19 Asak si sum nna Marai 18 hkala ai lam Kachin Human Rights Watch kawn n dau da ai re.

Htim gasat ai hta Nbungli Bawm hkrup mara jahkrat ai hte, Laknak kaba, Drone bawm ni a majaw re. Jinghpaw Mung hta 2025 September shata laman Nbungli htim gasat ai lam law malawng galaw ai hta Ma kaji ni hte mara kata Mung masha ni asak si sum hkala hkrum ai lam law wa ai re hpe chye lu ai.

Dai sha n-ga Myen mungdan hta Myen hpyen dap Mungdan ahkaw ahkang zing madu ai hpang kaw nna mungdan masha ni a n tsa ladu lai dip up ai lam matut manoi galaw ai rai nna Nbungli hku tim gasat ai mung Mungkan Hpyen Tara Upade hpe tawt lai ai re lam mung tang madun da ai re.

Ya na zawn Myen hpyen dap kawn Jinghpaw Mung kata shani shagu htu shadut htim gasat majan baw nga dingyang rai nna shani shagu gasat gala n byin tim Nbungli bawm jahkrat htim gasat ai lam matut manoi galaw nga ai re.

Shiga - Hpring

Photo credit to KHRW