Jinghpaw Mung Hte Sam Mung Dingdung Daw Ginra Hta July Shata Laman Mung Masha Marai 32 Asak Si Sum Ai Lam

Pajau Media

August 9, 2025

Jinghpaw Mung hte Sam Mung dingdung daw ginra ni hta Myen hpyen dap hte laknak lang hpung ni a majaw July shata mi laman Mung masha marai 32 asak si sum ai lam kachin Human Rights Watch kawn n dau da ai re.

Shata mi laman sha nbungli bawm, drone, htim gasat ai lam, sinat gap sat ai lam ni a majaw asak si sum ai re lam tsun da ai re.

 Mabyin gaw July 3 ya shani Jinghpaw Mung Hpakant AhMaik Pon mare Hpunggyi jawng n tsa kaw drone bawm wa hkrat ai majaw amyu shadang langai, amyu shayi langai asak ai sum nna marai 12 hkala sawng ai lam chye lu ai.

July 10 ya shani Hpakant Maw Si zar mare Sky Hotel shawng kaw mung namsi gayau dut sha ai La langai gap sat hkrum ai re hte July 30 ya shani Sam Mung dingdung daw Kuthkai Muklum hta mung Ya Su Tit Hotel kaw nbungli bawm wa jahkrat bun ai majaw Mung masha marai 6 asak si sum nna marai 8 hkala sawng ai mabyin nga wa sai re.

Dai sha n -ga july 31 ya shani Hpakant Maw Si Zar kaw mung Laknak kaba wa hkrat ai majaw Ma 2 hte Ma kanu asak si sum ai lam nga lai wa sai re.

Dai zawn sha Burmese Women's Union hpung ni hku nna mung Myen Hpyen dap a gumshem ai lai ladat hte htim gasat ai majaw July shata laman Myen Mungdan madang hku rai yang amyu shayi marai 64 asak si sum nna marai 80 hkala hkrum ai lam n dau da lai wa sai re.

shiga -Htu seng