Jinghpaw Mung Kata Bat Mi Laman Gasat Gala Majan (15) Lang Byin Ai Lam

Pajau Media

July 28, 2025

Ya aten Jinghpaw Mung Hpakant, Manmaw, Waimaw ginra hkan shani shagu ngu na daram gasat gala majan byin nga ai hta lai wa sai laban bat mi tup dai ginra mayan gasat gala majan (15) lang byin ai lam nga ai hpe KIA shiga hta tang madun da ai re.

Manmaw ginra de gaw ga lam hku htu shadut gasat ai lam n nga ai raitim Nbungli, Drone hte lak nak kaba ni hte shani shagu gap gasat nga ai re. Laban bat mi tup rai yang Drone bawm (58) lang, N bungli bawm (24) lang, laknak kaba (366) lang gap bun nga ai re hpe mung chye lu ai.

Manmaw ginra kata gap gasat ai hta sawng dik madang gap gasat hkrum ai gaw July (18) ya shani re hte dai shani hta N bungli bawm (14) lang, Drone bawm (27) lang, laknak kaba (163) lang gap gasat ai lam chye lu ai. N dai gap gasat ai lam gaw July shata laman hta sawng dik madang hku gap bun ai lam re hpe mung chye lu ai.

Waimaw lamyang ginra de mung Myen Hpyen Dap htu shadut shamu shamawt ai majaw hpyen masa grai shaja hkat nga ai re hte shani shagu lak nak kaba, drone hte gap ai gaw dingyang re. Majan masa a majaw ya aten Waimaw -Nang Zaw Yang, Washawng hkawm sa hkrun lam hpe mung July praw laman kaw nna pat da ai majaw mawdaw lai wa lai sa n nga ai sai re hpe mung chye lu ai.

Dai sha n-ga Hkat Cho, Da Jang ginra maga de mung Myen Hpyen Dap htu shadut shamu shamawt nga dingyang re majaw gasat gala majan laja nga dingyang re. Waimaw lamyang ginra hte Hkat Cho, Da Jang maga de hpyen shamu shamawt shagu Myitkyina M.P.HK kaw nna lak nak kaba gap garum dingyang re lam mung chye lu ai.

Hpakant ginra kata hta mung ya aten majan masa gaw grai naw shaja hkat nga dingyang re hte mung masha ni shanu nga ai mare kata hkan n bugli bawm, laknak kaba gap ai lam ni galaw ai lam, dai sha n-ga In Daw Gyi ginra Nam Mun, Mai Nawng ginra hkan na Sam Hkyeng P.T.Ts hpung ni mung masha ni nga n mai hkra jep ai majaw hprawng koi yen ra ai madang byin nga ai re hpe mung chye lu ai.

Jinghpaw Mung kata gasat gala majan hta Myen Hpyen Dap gaw madang tsaw ai drone, lak nak kaba ni ladu lai jai lang nna gap gasat nga dingyang rai nga ai hta KIA pawng hpawm hpung ni hku nna mung matut manoi ninghkap gasat nga dingyang re majaw Waimaw, Manmaw, Hpakant ginra kata ni hkan laban bat mi laman hta gasat gala majan (15) lang byin lai wa sai re hpe mung chye lu ai.

Shiga- Pyilan U