Jinghpaw Mung Kata Bat Mi Laman Gasat Gala Majan (17) Lang Byin Ai Hta Myen Hpyen Dap A Drone (6) Hpe Mung Gap Jahten Kau Lu Ai Lam

Pajau Media

August 18, 2025

Jinghpaw Mung kata ya aten gasat gala majan laja nga ai Manmaw ginra, Waimaw, Hpakant ginra ni hta bat mi laman KIA pawnghpawm hpung ni hte Myen hpyen dap lapran gasat gala majan (17) lang byin ai lam nga ai hpe KIA shiga kaw na chye lu ai.

Ndai laman majan laja dik ginra gaw Manmaw ginra re hte Myen hpyen dap hpung ni gaw lagaw lam sha n-ga nbungli bawm, drone, laknak kaba ni matut manoi gap bun ai re. Laban bat mi laman Manmaw ginra kata Myen hpyen dap gaw nbungli bawm 50 lang, drone 30 jan lang, laknak kaba 417 lang lahta gap bun ai re hte bat mi laman Myen hpyen dap a drone 6 hpe jahkrat jahten kau ai lam chye lu ai.

Manmaw ginra kata lagaw lam htu lung nga dingyang rai nna gasat gala majan hta lahkawng maga si hkala hkrum law nga ai re hpe mung chye lu ai. Hpakant ginra kata hta mung gasat gala majan masa gaw grai shaja ai hta Myen hpyen dap gaw Mung masha ni nga ai ginra de lak nak kaba, nbungli bawm ni shani shagu gap bang nga ai majaw Mung masha si hkala hkrum ai lam law nga ai re.

Dap Ba (9), Masat (26) dap dung ginra mung Mai Nawng, Ma Mung Kai ginra hta mung KIA pawng hpawm hpung ni hte SNA P.T.Ts hpung ni lapran gasat gala majan laja nga dingyang re lam mung chye lu ai.

 Dai sha n-ga Waimaw ginra kata hta mung Myen hpyen dap lagaw lam htu shadut htim gasat ai majaw gasat gala majan (3) lang byin ai hta Myitkyina hkran kaw nna lak nak kaba gap bun ai lam, nbungli, drone bawm ni wa jahkrat ai lam galaw nga ai re hpe mung chye lu ai.

 N Dai laman Hkat Cho, Da Jang ginra de mung Myen hpyen dap lagaw lam htu shadut ai lam matut manoi galaw nga majaw hpyen masa grai sadi maja ra ai masa re mung chye lu ai.

Jinghpaw Mung kata gasat gala majan gaw lani hte lani laja nga ai majaw Mung masha ni hpyen masa sadi maja let nga ra ai lam KIA maga kawn tsun sadi jaw da ai hpe chye lu ai.

Shiga- Pyilan U