Jinghpaw Mung Kata Bat Mi Laman Myen Hpyen Dap Y-12 N Bungli 60 Jan Lang Ting Gap Gasat Ai Lam

Pajau Media

May 19.2025

Myen hpyen dap gaw Yangon Nay Pyi Taw ginra hta lai nna Jinghpaw mung sha n-ga ngam ai ginra ni de n bungli, drone lak nak kaba ni hte gap gasat ai lam grau galaw nga ai re hte bat mi laman Jinghpaw mung ginra hta Y-12 n bungli hte bawm 60 jan lang gap gasat ai lam chye lu ai.

Jinghpaw mung Manmaw ginra sha n-ga Hpakant lam ginra mayan de ya aten du hkra gasat gala majan laja nga ai hta bat mi laman hta sha Y-12 n bungli hte 60 jan lang, Jet fighter hte 10 jan lang, Drone bawm (78) lang sha n-ga lak nak kaba (107) jan hkra laja lana gap gasat nga ai lam KIA shiga kawn tang madun da ai re.

Ya aten Myen mungdan gaw Sagaing Nnang Nawn kaba a majaw hten za mat ai ginra ni hta gaw sharawt masing galaw shakut nga ai aten Myen hpyen dap gaw Yangon, Nay Pyi Taw ginra hta lai nna ngam ai ginra hkan March 28 kaw na May 16 ya du hkra rai yang n bungli bawm a majaw asak si sum ai marai (416) du wa sai lam NUG asuya n dau da ai kaw na chye lu ai.

Myen mungdan ting hku rai yang n bungli bawm gap bun ai lam (445) lang galaw ai re hte n bungli bawm a majaw asak si sum ai lam law dik gaw Sagaing ginra rai nna hkala hkrum ai gaw marai (786) du hkra nga ai lam NUG tang madun da ai re.

Myen hpyen dap gaw ya byin nga ai gasat gala majan hta lagaw lam hku nna htu shadut htim gasat na gaw n loi sai re majaw n bungli hpe madung jai lang nna htim gasat wa ai masa re.

Myen hpyen dap gaw hpyen shada gasat hkat ai hta sum machyi wa ai hte rawt malan hpung ni Uphkang ai ginra hkan aten n tam n bungli bawm gap jahkrat ai masa gaw tat sum kau ai shara ni hpe bai n lu madu yang jahten kau na ngu ai masing hte htim gasat nga ai re lam Mung masa maram masam nga ai ni tsun ai kaw na chye lu ai.

Shiga – Pyilan U