Jinghpaw Mung Kata Gasat Gala Majan Masa Lam Hpe Tang Madun Ai Lam

Pajau Media

December 16, 2025

Jinghpaw Mung kata 2025 November shata laman KIA pawng hpawm dap hte Myen Hpyen Dap lapran gasat gala majan 4 lang byin ai rai nna Nbungli htim gasat ai lam gaw 7 lang du hkra nga ai lam BNI-Myanmar Peace Monitor kawn tang madun da ai re.

Gasat gala majan gaw Manmaw, Hpakant hte Waimaw ginra ni hta byin ai rai nna gasat gala majan a majaw hkala hkrum ai Mung masha marai 13 nga ai lam tang madun da ai re. Myen mungdan madang hku rai nna shata mi laman gasat gala majan (96) lang nga ai lam, Myen hpyen dap a nbungli htim gasat ai gaw 76 lang byin ai lam chye lu ai.

Shata mi laman gasat gala majan a majaw hpyen koi yen ai mung masha gaw 55,800 nga ai lam, ginra masha asak si sum ai gaw marai 180 hte hkala hkrum ai mung masha gaw 336 nga ai lam tsun da ai re.

Gasat gala majan matut manoi byin nga ai Manmaw ginra, Waimaw ginra hte Hpakant ginra ni hta ya du hkra gasat gala majan laja dingyang rai nna Myen hpyen dap gaw nbungli, drone bawm ni hte matut manoi htim gasat nga ai re lam chye lu ai.

Shiga – Htu Seng

Photo credit to Owner