Jinghpaw Mung Kata Ra Lata Poi Galaw Na Matu Masat Da Ai Ginra Hkan Hpyen Masa Grai Shaja Nga Ai Lam

Pajau Media

November 27, 2025

Myen Hpyen Dap gaw Ra Lata Poi galaw na matu masat da ai Jinghpaw Mung kata na ginra ni hta hpyen n-gun htu shadut ai lam matut manoi galaw nga ai sha n-ga Nbungli bawm, Drone, Laknak kaba gap gasat ai lam laja lana galaw nga ai re hpe mung chye lu ai.

Jinghpaw Mung Manmaw ginra de mung lai wa sai 2024 December shata kaw nna muklum zing madu majan byin hpang wa ai re hte shani shagu gasat gala majan byin ai gaw ya aten du hkra re. Myen Hpyen Dap gaw ntsa lam hku nna laja lana gap gasat ai majaw KIA pawng hpawm hpung ni gaw hpyen masa hku nau n ahkyak ai shara n kau hpe yen kau da ra ai re lam chye lu ai.

KIA pawn hpawm hpung ni zing madu da ai ahkyak ai shara ni hpe myen hpyen dap bai zing madu la lu hkra lagaw lam, ntsa lam hku nna laja lana htim gasat ai re. Lai wa sai August shata laman hta sha Hka lam hku nna Hpyen n-gun jahting la ngut ai hpang Masat (366) Amyawk Dap, Masat (5014) Tank Dap, Masat (236) Lagaw dap ni hpe KIA pawng hpawm hpung ni tat kau raitim September shata laman bai htim gasat zing madu la lu sai re.

Dai sha n-ga ya aten Hpakant hte Waimaw ginra de mung hpyen n-gun htu shadut htim gasat ai sha n-ga Nbungli bawm hkrup mara jahkrat gasat ai lam ni galaw ai majaw Mung masha ni si hkala hkrum ai lam shani shagu ngu na byin nga ai re hpe chye lu ai. Lai wa sai November 25 ya shana hta mung gasat gala n byin ai Waimaw Shwe Nyaung pin mare de nNbungli bawm wa jahkrat ai lam ni galaw ai re hpe mung chye lu ai.

Jinghpaw Mung Putao Hkawng Lang Hpu ginra de mung P.T.Ts hte myen hpyen dap pawng hpawm hpung ni hpyen shamu ai lam matut manoi galaw nga ai hte November 25 ya hta mung Hkawng Lang Hpu hte Lang Se maga de Hpyen n-gun 60 daram hte htu shadut wa ai majaw KIA pawng hpawm hpung ni hte gasat gala majan byin ai hta hpyen bawng masha marai lahkawng hpe lu rim ai lam ganghkau shiga hkan vedio mara wa ai kaw na chye lu ai.

Myen hpyen dap woi awn galaw na Ra lata poi aten ladaw ni wa sai re majaw ra lata poi galaw na matu masat da ai ginra ni hpe tat sum kau ai lam n nga hkra hte ginra maden ai lam ni hpe Myen hpyen dap laja lana galaw nga ai re. Ya aten Jinghpaw Mung Manmaw, Hpakant, Waimaw, Putao Hkawng Lang hpu ginra de myen hpyen dap laja lan htu shadut nga dingyang re hpe mung chye lu ai.

Shiga – Pyilan U