Jinghpaw Mung Kata Without Mawdaw Ni Hpe Rim Ai Majaw Mawdaw Shabrai Manu Rawt Nga Ai Lam

Pajau Media

June 12.2025

Jinghpaw Mung June praw bat kaw nna Licence n lawm ai Mawdaw ni hpe rim hpang nga sai majaw ya aten hkrun lam mawdaw shabrai ni mung grai rawt wa ai hte hkrun lam hkawm mung masha ni grai yak hkak wa ai lam chye lu ai.

Without Mawdaw rim wa ai majaw hkawm sa mawdaw ni grai yawm mat ai sha n-ga Myen hpyen dap P.T.Ts shagyit ni hkan mung gumhpraw grau hta sha wa ai masa hpe mung ya na zawn matut tsun dan ai re.

“ Licence n lawm ai Mawdaw ni hkawm sa ai lam grai yawm mat sai, hkrun lam lapran Myen shagyit, balik, P.T.Ts shagyit ni kaw Mawdaw kaji langai (5000) hta ai, shawng daw hta gaw (2000/3000) daram sha jaw ra ai re, dai majaw mawdaw shabrai hpe sharawt nna hta ma ai, Licence n lawm ai Mawdaw ni hpe rim ga nga yang Mungdan ting re, Asuya magam gun ni jawn ai mung Licence n lawm ai sha re, Licence n lawm ai ni hpe rim na nga marawn ai mawdaw mung Licence n lawm ai ” nga nna Myitkyina Mohnyin mawdaw gau sha ai mawdaw la tsun ai.

Ya aten Myitkyina Mohnyin ginra hkawm sa shabrai ni mung grai rawt mat ai hte hkawm sa hkawm wa yak hkak ai masa hpe ginra masha langai tsun ai hta

 “ myitkyina Mohnyin lapran mawdaw manu wa (70,000) re sai, moi Ar Nar n zing shi ai aten hta gaw Myitkyina Mohnyin lapran mawdaw shabrai (15,000) sha nga ai, lani hte lani mawdaw shabrai ni rawt wa ai, hkrun lam hkawm mung masha ni grai yak sai, masha hkum nan n du ga ngu tim Phone line bai n kaja re yang gaw bai hkawm sa ra, Mawdaw manu gaw rawt galaw lu galaw sha ra ai wa yak la ai” nga nna hkrun lam hkawm amyu shayi langai tsun ai re.

Mandalay Sagaing ginra lapran Myen hpyen dap, P.T.Ts, Balik shagyit ni nga ai re hte Sagaing hte Jinghpaw mung jarit lapran kaw sha shgyit manu n jaw ra ai raitim Namsi Awng kaw nna Myitkyina du hkra lam lapran hta shagyit manu jaw ra ai shara law dik re hte ya na zawn Licence n lawm ai mawdaw cycle ni hpe rim wa ai majaw Mung masha ni mung hkawm sa hkawm wa grau yak hkak mat ai re hpe mung chye lu ai.

Shiga- Kachin Pyi Tar