Jinghpaw Mung Sagaing Jarit Katha Muklum Hta Gasat Gala Majan Byin Ai Lam N Nga Tim Myen Hpyen Dap Drone Bawm Dingyang Jahkrat Bun Ai Lam

Pajau Media

January 16, 2026

Sagaing ginra kata na Katha muklum gasat gala majan gaw January 3 ya daram kaw nna shada gap hkat ai lam zim taw ai masa raitim Myen Hpyen Dap kawn gap ai drone bawm ni a majaw mung masha dum nta wan hkru hten mat ai lam ni byin hkrum nga ai re hpe chye lu ai.

Myen Hpyen Dap gaw January 14 ya shani hta sha drone bawm, laknak kaba 10 jan lang ting gap shadam ai majaw mung masha dum nta 10 hkawt ram wan hkru mat ai hte mung masha asak si sum ai lam ni byin nga ai re hpe mung chye lu ai.

Muklum kata gasat gala majan laja wa ai hte n kau gaw hprawng koi yen hkawm mat ai hte ja gumhpraw n lu ai majaw gara de n hprawng ai sha nga taw ai mung nga ai re. Hprawng koi yen ai mung asak lawt daw sha hprawng pru wa ai re majaw ya aten Katha hpyen koi yen mung masha ni mung lam shagu grai yak hkak nga ma ai lam hpyen koi yen mung masha langai tsun ai.

“Sut gan arung arai ni mung tawn kau da, tinang bai wa yang gaw tinang tawn kau da ai raw bai mu lu na gaw n loi sai, lagut ni grai sawng taw ai nga na, yawng gaw grai yak taw ai, bawm ni hkrup mara bai jahkrat ai hte gaw ngut sai gaw, ya mung drone bawm, laknak kaba ni gap dingyang re hte ” nga nna Katha hpyen koi yen mung masha langai tsun ai re.

Ya aten Katha ginra masha ni gaw kadai mung kadai chye ai de hprawng koi yen nga ma ai re hte lang na arung arai, malu masha ,tsi mawan ni grai ra kadawn nga ma ai lam Katha Buga Muna kyithkai ganghkau shiga laika man hta n dau da ai hkringdat ni kaw matut mahkai garum la mai ai lam chye lu ai.

Katha ginra majan gaw lai wa sai December 28 kaw nna rai sai hte January 3 ya daram kaw nna gasat gala majan zim taw ai masa raitim Myen Hpyen Dap gaw drone bawm, laknak kaba, nbungli ni hkrup mara gap bun nga dingyang re majaw grai naw sadi maja ra ai masa re lam ginra masha masha ni tsun ai kaw na chye lu ai.

Shiga – Pyilan U