Jinghpaw mung sagaing jarit mayan pat tawn da ai shagyit ni bai hpaw ya nga sai shiga

Majan a majaw bat mi daram Pat tawn da ai Jinghpaw mung Sagaing jarit mayan hkawm sa hkrun lam hpe November (22) ya jahpawt (6:00) AM aten kaw nna hpaw ya nga sai re lam chye lu ai.

Majan a majaw November shata shi jan ya kaw nna Nam Si Awng shagyit kaw mawdaw ni hpe n shalai ya mat ai raitim November (16) ya hta gaw jinghpaw mung kaw nna pru ai mawdaw ni hpe lai ahkang jaw ai hta KIA/KPDF pawng hpawm hpyen hpung dung ai Maw Lu, Nan Tiya shagyit kaw n shalai ai majaw bat mi daram na hkra chyat rawng ra mat ai hte November (22) ya jahpawt kaw nna yawng hpe wang lu wang lang shalai ai re hpe mung chye lu ai.

Ya na zawn hkawm sa hkrun lam bai hpaw ya ai lam hte seng nna shagyit lit nga ai salang tsun ai hta

“ shagyit hpe dai hpawt (6:00) Am kaw nna shana de (6:00) du hkra hkawm sa ahkang jaw da ai re, galoi aten du hkra hpaw na ngu ai hpe tup hkrak n lu tsun shi ai, masa hta hkan nna pat yang mung pat wa mai ai “ lam ya na zawn tsun da ai re.

Jinghpaw mung kata majan laja wa ai hpang kaw nna hkawm sa Mawdaw hte Gunrai mawdaw ni yawng hkring mat ai majaw Jinghpaw mungdaw kata malu masha Gunrai hte jak Sau manu ni ladu lai tsaw lung wa ai re majaw Mung masha law law grai yak hkak ginchyum chyat mat ai rai nna hkawm sa hkrun lam hpaw na hpe yawng myit mada nga ai aten ya na zawn bai hpaw dat ya masa re hte Mung masa hta hkan nna hkrun lam masa ni mung galai shai wa mai ai lam lit nga ai ni tsun da ai kaw na chye lu ai.