Jinghpaw mungdaw kata Internet Line pat kau ya ai (5) ya ram na ai hpang bai hpaw ya sai lam

Pajau Media Channel

Jinghpaw Mungdaw ginra hta Internet, Phone line n kau mi atsawm n lu mat ai aten ladaw ram ram na wa sai re hte Dec (12) ya shana daw kaw nna gaw Atom sim card Line bai hpaw ya sai re.

Mung masha Wan (5) grup yin shanu nga ai Jinghpaw Mungdaw kata Internet n lu mat ai majaw Online hte galaw ra ai sut hpaga magam bungli ni ram ram yak hkak ginchyum chyat mat ai re. Ya aten myen mungdan kaw Law malawng jai lang nga ai Atom, Mytel, Oredoo, MPT Operator ni hte gindun nna Sut hpaga bungli galaw sha masha ni hte Online gumhpraw shalai sha ai zawn re ai magam bungli ni grai yak hkak mat ai re. Ph line lu ai ngu ai hta CDMA(MEC) Phone Line sha atsawm mai shaga ai madang re hte internet gaw 3G Network sha lu ai re hpe mung chye lu ai.

CDMA(MEC) phone SiM Card hte hpawn rai yang (300,000) a lahta jaw nna mari lang ra ai rai nna Internet hpe 1 MB hta Myen gumhpraw Lap (6) manu hku jaw nna jai lang ra nga ai masa re majaw dai ni tam dai ni sha Mung masha ni gaw mari lang na matu grai yak hkak mat ai madang re hpe mung chye lu ai. Myitkyina Muklum kata CDMA(MEC) SIM Card hpe Seng langai hta sha mai lu ai re hte lani mi hta Card (12 kaw 14) du hkra sha sharam nna dut ya nga ai lam mung chye lu ai.

Jinghpaw mung ginra kata Internet tsep kawp n lu mat ai gaw Dec (7) ya shani kaw nna rai sai re hte Jinghpaw mung kata ya na zawn internet atsawm nlu lang ai gaw shata lahkawng rai wa sai rai nna Dec (12) ya shana daw kaw nna gaw Atom Sim Card hpe Internet hte phone line bai hpaw ya sai re hpe mung chye lu ai.