Jinghpaw Mungdaw Myitkyina Muklum Na Hpaji Jawng Ni Hta Hkamja Dap Ni Kawn Covid-19 Makawp Maga Tsi Htu Ya Nga

Pajau Media

9 June, 2025

Covid-19 ana kalang bai chyam bra wa ai majaw Jinghpaw mungdaw Myitkyina muklum kaw nga ai hpaji jawng ni hta Jinghpaw Mungdaw Hkamja Dap ni kawn Covid-19 makawp maga tsi htu ya taw ai lam hpe jawng ma ni tsun ai .

“Covid grai bai sawng wa na jawng ni hkan du hkra Covid makawp maga tsi hkan htu ya taw ai, shanhte dai hku hkan htu ya ai mung hkrak mat nga, jawng kaw ahkang la na tsi rung du hkra nsa htu ra sai majaw jawng ma ni na matu grau hkrak mat ai,” nga nna G-12 jawng ma langai tsun ai.

Jinghpaw Mungdaw Hkamja Dap ni kawn Covid-19 makawp maga tsi hpe June shata praw 5 ya shani kaw na hpang nna hpaji jawng ni hta hkan htu hpang wa sai re hte masat (5) lahta tsang jawng kaw gaw sa htu ya ngut sai lam chye lu ai.

Ya Myen mung kata Covid-19 ana byin ai bai law wa ai a majaw makawp maga tsi hpe seng ang ai magam gun ni kawn jawng kaw du hkra sa htu ya ai re hpe chye lu ai.

Dai sha n-ga Myitkyina mung shawa tsi rung hta mung Covid makawp maga tsi hpe bai htu ya taw sai rai nna mung masha ni mung makawp maga tsi hpe bai htu ra ai nga nna ndau shana da ai re.

Covid-19 ana gaw 2019 ning December shata kaw na hpang wa ai rai nna mungdan shara shagu hta chyam bra wa ai re hte asak kaji kaba n lata ana kap lawan ai re majaw tsang ra ai ana hpan mi re.

Myen mung Hkamja Dap kawn Covid-19 ana hpe mungkan ana zinli ngu nmasat mat nna duhkra ladaw ana zawn ginra kata ayan kap chyam bra chye ai ana ngu na galai masat kau ai majaw hkamja lam hte seng ai shadum jahprang da ai ladat ni hpe hkan nang hkan sa ra ai nga nna shadum da ai re.

Shiga-Hpring