July Shata Laman KIA Pawng Hpawm Hpung Ni Hte Myen Hpyen Dap Lapran Gasat Gala Majan (20) Lang Jan Byin Ai Lam

Pajau Media

August 22, 2025

Jinghpaw Mung hta 2025 July shata laman KIA pawng hpawm hpung ni hte Myen hpyen dap lapran gasat gala majan (20) lang du hkra byin lai wa sai rai nna nbungli hku htim gasat ai lam gaw (9) lang du hkra nga ai lam BNI-Myanmar Peace Monitor kawn tang madun da ai re .

Gasat gala majan gaw Manmaw ginra, Hpakant ginra, Mohnyin ginra hte Waimaw girna ni hta byin ai re lam chye lu ai. Myen mungdan madang hku rai yang gasat gala majan (130) lang nga ai rai nna Myen hpyen dap a nbungli htim gasat ai lam gaw (97) lang, majan a majaw hpyen koi yen Mung masha gaw (37,000) nga ai lam, Mung masha asak si sum ai gaw marai (297) hte hkala hkrum ai Mung masha gaw marai (417) nga ai lam tsun da ai re.

Ya aten du hkra Manmaw ginra de gasat gala majan laja nga dingyang rai nna Manmaw ginra na shara law malawng hpe KIA pawng hpawm hpung ni zing madu da lu sai re hpe mung chye lu ai.

Raitim Ts.K.Hk (21), Manmaw Dakkasu Jawng , Muklum shara ni hte pawng hpawm rung, Win Light Hotel hte Myitsone Hotel shara ni kaw gasat gala majan laja nga ai re. Gasat gala majan laja nga ai hta Myen hpyen dap gaw nbungli, drone, madang tsaw lak nak kaba ni shani shana matut manoi gap bun nga dingyang re hpe mung chye lu ai.

Dai sha n-ga Hpakant ginra Ka Mai Nam Ya hkrun lam hta mung Myen hpyen dap shara la nna hkrun lam hkawm masha ni hpe jep joi ai lam, Ma U Pin lahta Chyauk Htu, Nam Ya, Nam Ting, Yam shadu jak rung, Lay Pin Gate shara hkan mung mying, mawdaw numbat hte Mung Chying masat ni hpe laja lana jep nga ai lam mung chye lu ai.

Shiga - Htu Seng