Ka-Mu Tam Hkawm Aten Bawm Kabye Kapaw La Nna Mung Masha Lagaw Lahkawng Maga Daw Mat Ai Lam

Pajau Media

May 30.2025

Lanam ladaw hta pru ai kamu tam hkawm nna Mung masha ni Bawm kabye kapaw la manghkang ni Mohnyin ginra hta byin nga ai lam ginra masha ni tsun ai kaw na chye lu ai.

Monyin ginra Nyaung Kai mare kaw na asak (50) ning re ai Daw Kyi San ngu ai hpaw mi gaw May (20) ya shani mare hte Deng (2) daram sha tsan ai de Ka-mu tam hkawm ai aten Myen hpyen dap kawn Hkam da ai bawm kabye kapaw la nna lagaw lahkawng maga daw mat ai lam ginra masha ni tsun ai.

“ ya n dai laman gaw Ka-mu ni grai rawt ai aten re, Ka-mu ni mung manu rawt ai majaw nam de sa tam hkawm nna bai dut sha ai re, ya aten na yak hkak ai masa hta Nam hkan na tam lu tam sha nga ai re, kaja nga Yang anhte mare masha ni mung Bawm makawp maga wunkat ni lung da ai re, ya bawm kabye kapaw la ai shara hte bawm sadi maja laika shakap da ai gaw deng mi daram san ai majaw Bawm nga na n chye ai majaw re ” ginra masha amyu shayi langai tsun ai re.

Hkala hkrum ai daw Kyi San gaw lagaw lahkawng maga daw kau ra ai hte lata lahpan mung daw mat ai majaw ya aten Mohnyin tsi rung kaba kaw tsi gawn lajang nga ai kaw na masa grai tsang ra ai majaw Myitkyina tsi rung de bai htawt sit ra ai lam chye lu ai.

 Yi Sun hkau na sha galaw sha let kan bau ai re majaw ya na zawn hkala n ba hkrum ai dum nta masha ni Ja gumhpraw garum ningtum ra kadawn nga ai lam mung chye lu ai.

Shiga- Kachin Pyi Tar