Ka-ni Lu Sha Masha Ni Gaw N Htu Ni Hpai Nna Nga Hkawm Ai Majaw Lit Nga Ai Ni Kawn Hkang Zing Na Matu Mung Masha Ni Ra Sharawng Nga Ai Lam

Pajau Media

October 3, 2025

Jinghpaw Mung Mohnyin ginra hta ka- ni lu sha masha ni gaw lam n tsa hkan n htu ni hpai nna nga hkawm ai majaw ginra masha ni hkrit tsang nga ma ai hte lit nga ai ni kawn lawan hkang zing ai lam galaw na hpe ra sharawng nga ma ai re.

Ka-ni lu sha masha ni moi na hta grau law wa ai majaw Muklum kata n htu ni hpai nna nga hkawm nga ai hpe ginra masha ni grai hkrit tsang ai lam lu sha seng hpaw da ai asak 45 ning amyu shayi langai tsun ai re.

"N dai ka-ni ya ni gaw lani mi hta masum lang ram seng de sa ai, shat wa mari ai kalang, tsa dut ai i nga wa san, seng shawng kaw aw ra zawn n dai zawn re gayin hkawm, seng de sa wa yang mung n htu hpe n hpye kaw bang da ai, seng kaw masha nau n nga ai aten hpe yu maram na sa ai masa she re majaw grai hkrit ai yawng sadi maja ra sai" nga nna tsun ai.

Muklum kata nga Mung masha ni tsun ai hta ka-ni lu sha masha ni gaw shana aten hpyen wunkat la taw zawn re na grai garu marawn jahtau ai lam tsun ai re.

"Lai wa sai masum ya ram hta mung shana hkying 1 daram kaw Ka-ni ya lahkawng gaw pai hkra pai hkra nga matut manoi marawt taw, n chye yang hpyen la zawn she re" nga nna tsun ai.

Ka-ni lu sha masha ni gaw မိုးဒါးစုရပ်ကွက်၊ ကျားဖြူဘုရားကြီးဇာတ်ရုံ၊ အရှေ့စုရပ်ကွက် လျောင်းတော်မူဘုရားကြီးဇာတ်ရုံ၊ Awng Thepye lawk kaw na dumsu lawng dingsa hkan nga hkawm ai re hte Mare lawk hkan hpyi hkawm nna Mung masha hpe hkan dingsa na hpe myit tsang nga ma ai re.

Lai wa sai August shata hta Ka-ni lu sha masha marai 60 jan hpe Mohnyin ginra de mawdaw hte wa htaw sa kabai da ai hpang n kau gaw In daw Gyi ginra na SNA ni hpyen lahkawn mat wa ai kaw lawm nna Hpyen wunkat la ai ni mung lawm ai re hpe chye lu ai.

Dai majaw Ginra masha ni gaw dingbai dingna jaw na hpe grai hkrit tsang nga ma ai re hpe mung chye lu ai.

Shiga - Kachin Pyi Tar