Kachin Human Rights Watch-KHRW Kawn June 1 Kaw Na 8 Ya Laman Hpakant Ginra Mungshawa Ni A Dum Nta Ni Hpe Myen Hpyen Dap Kawn Wan Nat Jahten Ai Lam 11 Lang Galaw Lai Wa Sai Lam Ndau

Pajau Media

June 9, 2025

June praw 1 kaw nna 8 ya shani du hkra, nhtoi 8 ya laman Gumshem Myen Hpyen Dap gaw Hpakant ginra kata na mungshawa nta ni hpe dasang wan nat jahten ai lam (11) lang galaw lai wa sai hpe, Kachin Human Rights Watch-KHRW ndau da ai kaw na chye lu ai.

Ndai Myen hpyen dap ni a mazut ai lai len rai nga ai lak nak kaba gap shadam bun ai majaw nhtoi 8 ya laman hta sha mara kata mungshawa marai (11) mung asak si sum mat wa sai re hpe chye lu ai.

Gumshem Myen Hpyen Dap gaw Hpakant ginra hpe kalang bai jum tek uphkang lu na matu May shata praw kawn, hpyen man hpaw shamu shamawt lung wa ai rai nna, mungshawa ni hpe gap sat ai lam, nta wan nat jahten ai lam, bungli galaw masha ni a nta ni hte jak rai ni hpe jahten sharun ai lam, galaw wa ai re.

Ya aten Myen hpyen dap gaw Hpakant ginra law malawng hta hpyen man htu shadut shamu shamawtlam galaw nga ai re hte lak nak kaba gap shadam ai lam, mungshawa dum nta wan nat jahten ai lam ni sha n-ga, mungshawa ni hpe masha ninggang shatai rim ahkyak la ai lam ni hpe mung dingyang galaw nga ai re.

Ndai June shata nhtoi 9 ya shani hta mung Hpakant - Seng Tawng ginra lahta maga de bawm kapaw nsen na lu nna, wan hkru nga ai hpe mu lu ai nga nna ginra masha ni tsun dan ai re.

Gumshem Myen hpyen dap gaw ya aten du hkra Hpakant ginra sha n-ga, Jinghpaw mung shara shagu ngu na daram hta nbungli hte gap gasat ai lam, lak nak kaba gap bun ai lam ni hte Drone hte gap gasat ai lam dingyang galaw nga ai re majaw hpyen yen mungshawa ni gaw lani hte lani grau grau law jat wa nga ai re hpe mung matut chye lu ai.

Shiga - Hpring