Katha Muklum Kata Myen Hpyen Dap Nbungli Matut Manoi Gap Bun Nga Ai Lam

Pajau Media

January 3.2026

Jinghpaw Mung Sagaing jarit Katha muklum zing madu majan gaw kajawng kaja byin wa ai rai nna muklum kata ya aten du hkra gasat gala majan laja nga dingyang rai nna nbungli bawm mung matut manoi jahkrat bun nga ai lam chye lu ai.

Katha muklum kaw na hprawng yen wa ai mung masha langai tsun ai hta “Anhte Katha bu ni gaw yawng hprawng sai ga re dum bri dum bra rai, nbungli gap ai wa n hkring n sa re, mung masha ni hpe sadi jaw ai lam n nga kajawng kaja byin ai majaw hpa arai mung n lu la dai hku kabai kau da" nga nna Katha kaw na hprawng pru wa ai mung masha langai tsun ai re.

Ya aten Katha Ginra Hk.M.Y 309 sha n-ga masat 1 balik Dap ni, masat 2 balik dap, Katha htawng hte n ta tsaw ai hkan shara la da ai lam hte majan gaw laja nga ai re hpe chye Lu ai.

January 2 ya hkan mung Katha Lawk 5 maga de n bungli bawm wa jahkrat bun ai majaw mung masha dum n hten za wan hkru ai lam, Katha lahta tsang jawng mung wan hkru mat ai hpe chye lu ai.

“Mung masha ni gaw grai jam jau sai, law malawng gaw Naba lahta de hprawng ma ai, ja gumhpraw n lu myi hprwi hte re ai mung masha mung law law re, n kau gaw Mandalay maga hprawng ai, ya gaw Myen Hpyen Dap hpe wang da ai masa re majaw shiga la madat ai hpan re sai" nga nna lahta na mung masha tsun ai re.

Lagaw lam hku na Myen Hpyen Dap shang gasat na n mai mat ai majaw madung gaw n tsa hku na n-gun dat gasat nga ai re hpe mung chye lu ai.

Kahta Ginra de lai wa sai December 26 ya daram kaw nna hpyen masa shaja wa ai rai nna Myen Hpyen Dap ra lata poi galaw ai December 28 ya hta ginra makawp rawt malan hpung ni htim gasat wa ai re.

December 31 ya kaw nna Katha hpyen yen mung masha ni hprawng pru wa lu ai hte Muklum kata rawt malan hpung shang shamu shamawt wa ai re hpe chye lu ai.

Shiga -Pyilan U