KBC Ginjaw Kaw Nna dat Ai Ap Nawng Sara Num 2 Mazut Roi Rip Sat Hkrum Ai 11 Ning Hpring Sai

Pajau Media

19 January 2026

KBC ginjaw kaw nna dat ai Hpaji Sasana Saranum 2 mazut roi rip sat hkrum ai manghkang gaw shaning 11 ning du sai raitim ya aten du hkra teng man tara rap ra ai mahtai n lu re.

Saranum Maran Lu Nan hte Tangbau Hkawn Nan Tsin yan gaw lai wa sai 2015 ning January 19 ya jahpawt hkying 1 aten daram hta Sam Mung Dingdung daw Kawng Hka mare, Kyauk Mye kaw daju ai Myen Hpyen Dap Hk.M.Y (503) kata na masha ni kawn mazut roi rip zingri sat kau hkrum lai wa sai re.

Saranum lahkawng hpe ntara ai hku mazut roi rip zingri sat hkrum ai 11 ning na du hkra teng man tara rap ra ai lam n lu shi ai hte teng man ai lam hpe naw makoi magap da nga dingyang re hpe mung chye lu ai.

KHRW kaw na tsun ahkang lu ai Ko Jacob mung "Lawt mat ai lam n nga hkra KHRW gaw teng man ai lam hta tsap sa wa na re (ပြစ်ဒဏ်ကင်းလွတ်ခွင့် အဆုံးသတ်ရေး KHRW ဆက်လက် ရပ်တည်မည် ) ” nga nna tsun ai re hpe chye lu ai.

Asak 20 ning daram re ai Saranum Maran Lu Ra hte Asak 21 ning Saranum Tangbau Hkawn Nan Tsin yan n tara ai hku sat krum ai lam hpe teng man rap ra ai lam lu hkra lit nga ai salang ni matut galaw nga dingyang re lam chye lu ai.

Lai wa sai shaning ni hta mung Saranum lahkawng a myit dum a kyu hpyi ai lamang ni hpe KBC ginjaw kaw nna woi awn let mung shawa law law hte akyu hpyi lamang ni galaw ai raiitim 2023 ning hpang daw kaw nna hpyen masa, mung masa lam amyu myu a majaw n lu galaw mat ai re hpe mung chye lu ai.

Shiga- Htu Seng