KIA Ba (9) Ginra De Hpyen Masa Grai Naw Laja Nga

Pajau Media

May 2, 2025

KIA masat (9) dap ba Hpakant ginra Nam Ya mare makau mayan kaw dai ni du hkra gasat gala majan laja nga nna nbungli bawm gap gasat nga ai lam chye lu ai.

Ginra masha ni tsun ai hta Myitkyina kaw na lung wa ai Jet nbungli hte wa gap gasat ai lam ni nga ai re hpe mung chye lu ai. Myen hpyen dap gaw Ka Mai maga kaw nna hpyen n-gun kaba hte Hpakant ginra de htu shadut wa ai aten gasat gala byin ai re lam shawng lam shi sawk ni tsun ai.

Dai sha n-ga Hpakant Lido lam ntsa nga ai Lawa mare akyu hpyi bum kaw dap shara jahkat nga ai Myen hpyen hpung ni hpe KIA pawng hpawm ni kawn May praw 1 ya shani kawn laja lana gasat ai gaw ya dai ni du hkra re ai hte hpyen masa naw shaja hkat nga ai re hpe chye lu ai.

Lawa akyu hpyi bum kaw shara jahkrat nga ai Myen hpyen dap hpe KIA pawng hpawm hpung ni zing madu la lu sai lam Facebook ntsa hkan tsun nga ma ai raitim Pajau Media kaw nna lak san shagrin la na matu yak nga ai re.

Myitkyina Hpakant, Lido lam dingyang hpyen masa shaja hkat nga ai re majaw hpyen koi yen ai mung masha law wa nga sai re hte law malawng gaw Hpakant Lung Hkang ginra ni de koi yen nga ai re lam chye lu ai.

Shiga- Htu Seng