KIA Pawng Hpawm Hpung Ni Kawn Myen Hpyen Dap N Bungli (2) Lu Gap Jahkrat

Pajau Media

May 20.2025

Jinghpaw mung Manmaw ginra de hpyen garum sa ai Myen hpyen n bungli Helicopter (3) hpe Rawt Malan Hpung ni kaw nna gap dat ai hta lahkawng gaw gap jahkrat kau lu nna langai gaw Myitkyina n bungli dap de lawan ladan wa hkring ai lam Banmaw Scout team kaw nna chye lu ai.

Myitkyina maga kaw nna hpyen garum sa ai hpyen n bungli masum gaw May (20) ya shani rawt malan hpung ni kawn gap jahkrat ai hta langai gaw Zin Hkan mare makau hta wa hkrat ai rai nna langai gaw Shwe Gu kaw hkyak hkyak yu mat ai re lam chye lu ai.

Myen hpyen dap gaw Manmaw ginra de Hpyen n-gun jat ai lam hpe Helicopter hte dingyang galaw nga ai re hte Manmaw muklum zing majan gaw shata (5) daram na wa sai re. Ya aten du hkra KIA pawng hpawm hpung ni hte Myen hpyen dap lapran gasat gala majan laja nga dingyang re hpe mung chye lu ai.

May 19 ya shani Hpakant ginra de lung wa ai Myen hpyen dap hte P.T.Ts pawng hpawm hpung ni hpe KIA pawng hpawm hpung ni Hkrai Run mare kaw ang katut gasat gala byin nna May 18 ya shani kaw nna Hpakant lam Seng Hpara Hkrai Run lapran gasat gala majan bai laja wa ai re hpe mung chye lu ai.

Myen hpyen dap hpung ni gaw Hpakant ginra hpe zing madu lu na matu April shata kaw na hpyen n-gun jat htu shadut lung wa ai re hte dai ni du hkra gasat gala majan laja nga ai re hpe mung chye lu ai.

Shiga- Htu Seng