KIA Tat Sum Kau Ai Dap Shara N Kau Hpe Bai Zing Madu Ai Lam

Pajau Media

October 3, 2025

Manmaw Muklum zing madu majan hta KIA pawng hpawm hpung ni tat sum kau ai Dap shara ni hpe bai htim gasat zing madu la lu ai lam nga ai re.

"N dai maga de gasat gala majan gaw shani shagu byin nga ai, raitim mani shawng shani na ram majan laja ai n nga ai, mani hkan byin ai Manmaw majan gaw laja dik sai, dai majaw tat kau sai shara ni hpe bai lu la ai re" nga nna tsun ai.

Gasat gala majan laman Myen hpyen dap gaw Nbungli htim gasat ai lam laja lana galaw ai hpang Masat 11 Tsi dap (မဆရ)hte Masat (5) matut mahkai dap ni pawng hpawm nna htu shadut majan shang ai majaw September 24 ya shani Manmaw Muklum deng 3 Dap, Shwe Pyi Tar dap hte KBC Nawku Jawng kawng ni hpe KIA kawn yen kau da ra sai re.

Yen kau da ai Dap shara masum hpe KIA pawng hpawm hpung ni htu shadut ai hta October 1 ya shana daw hta zing madu la lu ai re lam chye lu ai.

Shata 10 daram na hkra htim gasat ai Manmaw majan gaw ya aten du hkra gasat gala shani shagu laja nga ai re hte Myen hpyen dap gaw Nbungli bawm jahkrat ai lam ahani shagu galaw nga ai re.

Shiga-Hpring