KIO Asuya Uphkang Ginra Kata Asuya Hkrang Hte Maren Mung Masha Ni Hpe Htinggaw Jahpan, Mung Chying Masat Ni Galaw Ya Nga Ai Lam

Pajau Media

17 November 2025

KIO Asuya uphkang ginra kata nga Mung masha ni hpe KIO Asuya masha pru shang gawn hkang magam dap kaw nna woi awn ai htinggaw jahpan laika, Mung Chying Masat ni hpe galaw ya nga ai hta November praw laman Sinna Ginwang ginjaw kata nga Mung Chying masha ni hpe KIO Asuya a Htinggaw jahpan laika, Mung Chying Masat ni galaw ya sai lam chye lu ai.

Ya na zawn galaw wa ai gaw Shanglawt Asuya gaw Asuya ngu ai kata tinang a Mung Chying mung shawa ni hpe Mung Chying masha hkrang hku galaw ya ai re lam chye lu ai. November 5 ya kaw nna 13 ya du hkra gaw Sinna Ginwang Lawt Awng Mare kata nga ai Mung masha ni hpe galaw ya ai re .

 Shanglawt uphkang ginra Ginwang shagu ngu na de Mung Masha pru shang magam dap hpaw ai lam, magam dap hte seng nna ningmu jahpaw ai lam ni hpe galaw nna ta tut magam bungli shang wa ai re lam chye lu ai. Sinna ginwang kata hta masha pru shang gawn hkang magam dap hpe June shata praw 5 ya kaw nna hpaw ning htan da lu sai re hpe mung chye lu ai.

Dai sha n-ga 2024 March 7 ya kaw nna hpang wa ai htu shadut majan hpang KIA zing madu da ai Myitkyina Manmaw lam mayan mare kahtawng hkan nga ai Mung masha ni hpe mung Shanglawt Asuya Htinggaw jahpan laika pa ni galaw ya sai re lam ginra masha ni kaw na chye lu ai.

Shiga – Pyilan U