KIO Asuya Woi Awn Ai Kata Shata Kru Laman Ka-Ni Nang Hpam Amu 200 Jan Hte Tara hkam masha 200 Jan Hpe Tara Je Yang Lu ai lam

Pajau Media

12 July, 2025

Shanglawt uphkang ginra kata Ginjaw Asuya kawn woi awn ai masing kata ka-ni nanghpam Pat Jasan bungli hpe n gun dat galaw nga ai re hte 2025 January kaw nna June shata du hkra shata kru laman ka-ni nang hpam hte seng ai amu 208 du hkra hparan lu ai lam KIA shiga dap kaw nna chye lu ai.

Ginjaw PJS Komiti a masing kata KIO uphkang ai ginwang shagu hkan na mung lawm ai re hte amu 208 hte hpawn tara hkam masha marai 270 mung lawm ai re . tara hkam masha kaw amyu shayi marai 69 mung lawm ai lam tang madun da ai.

Lu rim la ai tara hkam masha ni hta yawm htum htawng dam 7 ning kaw nna 20 ning du hkra masat jahkrat hkrum ai ni mung lawm ai re. KIO asuya gaw ka -ni nanghpam hpe hpyen machying hku masat nna dut hpaga, lu sha ai lam ginjaw asuya PJS masing kata ja ja ninghkap gasat ai lam galaw ai re.

Shanglawt Uphkang Ginra kata ginwang shagu hkan na mung lawm ai re hte Wunpawng Mungdan kata ka-ni nang hpam lu sha dut ginlen ai lam hkoi tsai mat hkra KIO asuya kawn ninghkap Pat Jasan ai lam hpe ninggam hte ninggam n gun dat galaw nga ai re lam chye lu ai.

Jinghpaw Mung kata hta Myen Mungdan uphkang tara hten za mat ai hpang kaw nna grau ka-ni nang hpam lu sha jai lang ai lam ni wang lu wang lang galaw nga ai sha n-ga pyaw chyai ginra ni rai nga ai KTV hkan asak ram ai ramma law law nang hpam hta pyaw len hten za ai lam law wa ai re .

Wunpawng Mungdan Shanglawt Asuya kawn gaw n dai masa hpe gawn hkang lu na matu KIO ginjaw ginra Laiza, Mai Ja Yang hte Shanglawt uphkang ginra ni kaw KTV seng ni hpe pat kau na matu June shata hta n dau shabra ai lam galaw lai wa sai re hpe mung chye lu ai.

shiga -Pyilan U