KIO Ginjaw Ginra Kata Nga Hpyen Yen Mung Masha Ni Hka Hpyen Laja Lana Hkrum Sha Nga Ai Lam

Pajau Media

August 4, 2025

Hpyen Yen Mung masha ni law malawng shanu nga ai Laiza ginra hta August 4 ya hkying 2:00Am aten daram kaw nna Je Yang Hka Tung kaba wa ai majaw Hpyen Yen Dabang Dum n ta Tsi Rung ni hka Kaba ai kaw lawm mat ai lam Chye lu ai.

"Shana hkying 12 daram kaw nna marang kaba htu ai, Bum de mung htu ai majaw she n rai i Hkying 2:00 Am Daram kaw nna hka kajawng kaja kaba wa ai, Bum hka re majaw kajawng kaja kaba ai, Hka makau hkan na Hpyen yen n ta ni, Alen Bum Jawng Tsi jaw gawk ni pyi lawm mat ai, Hka makau hkan na ni gaw yawng re ga nga Sut Mu Awng hpyen Yen dabang gaw chyen mi pyi lawm mat nga na ai, Asak kaba ai ni pyi lawm mat da, tim atsawm gaw n chye shi ai" nga nna laiza hka makau kaw nga ai Mung masha tsun ai.

Laiza hka mung kaba ai raitim aten gadun laman yawm mat ai re lam chye lu ai. Je Yang Hka Tung kaba ai majaw hka makau na Sut Mu Awng, Hpun Lum Yang, Je Yang, Ja Htu Kawng, Mung Seng Yang hkan na Mung masha Dum n ta ni lawm mat ai sha n-ga Mung masha n kau mung lawm mat ai lam na lu ai hte shiga matut sagawn Dingyang re.

August 4 ya Jahpawt hta sha Mung Seng Yang hte Laiza hpe matut da ai Mung Lai Hka Makrai mung hka lim mat ai re hte shana daw hkying 1:00Pm aten daram hta gaw hka yawm wa nna Mahkrai jasan jaseng ai lam galaw nga ai lam chye lu ai. Mahkrai Shakum ni daw Hten mat ai lam, Marang htu sawng ai hta Laiza Mai Ja Yang hkawm sa hkrun lam mung sharut Ga gyi ai majaw lam Pat taw ai re hpe mung chye lu ai.

Dai sha n-ga Hpyen yen Mung masha ni bai wa nga ai Katsu Dabang ginra hta mung August 4 ya Jahpawt kaw nna Dabak hka kaba wa ai majaw Mung masha dum n ta lim ai lam chye lu ai.

Du hkra ladaw Maram Masam nga ai Hpaji Ning Hkring ni tsun ai hta dai ning gaw shawoi shaning na hta du

hkra ladaw tsin yam hkrum sha wa mai hte Hka kaba ai lam matut manoi sawng wa mai ai majaw Hka hpyen sadi maja na lam tsun hpaji jaw da ai re hpe mung chye lu ai.

shiga -Pyilan U