KIO/KIA Kawn Gaw Ra Lata Poi Hpe Masat Masa N Galaw Ai Lam KIO Tsun Ahkang Lu Salang Tsun Ai Lam

Pajau Media

December 18, 2025

Myen Hpyen Dap woi awn galaw na ra lata poi hpe KIO kawn gaw masat masa galaw na n re lam, KIA uphkang ginra ni hta mung ra lata poi galaw na ahkang jaw na n re lam KIO/KIA tsun ahkang lu Du kaba N hpang Naw Bu tsun da ai re.

Du wa na December 28 ya shani kaw na 2026 January du hkra ra lata poi hpe daw 3 garan nna galaw sa wa na re lam ra lata poi commission kawn ndau da ai re.

Ya aten Jinghpaw Mung kata hta Putao ginra, Waimaw Ginra, Hpakant hte manmaw ginra ni hta gaw majan sawng nga ai dingyang rai nna Myen Hpyen Dap ga lam hku htu shadut ai sha n-ga Ntsa lam hku nna mung matut manoi gap gasat nga ai re.

Dai sha n-ga Myen Hpyen Dap gaw Jinghpaw mung ginra mung lawm nna mungdan ting hta nga ai ramma ni hpe mung hpyen wunkat jaw na matu hpyen lahkawn ai lam ni matut manoi galaw nga ai re lam chye lu ai.

Dai majaw KIA/KIO hku nna gaw Myen hpyen dap hkrat sum na matu matut manoi htu shadut htim gasat sa wa na re lam Du Kaba Naw Bu tsun ai re hpe chye lu ai.

Shiga: Hpring