KIO Pat Ja San Komiti Woi Awn Ai Kata Chihpwi Ginra Pang (2) Ka-ni Dawn Jasan Ai Hta Marai (60) Jan Dawn Jasan La Lu Sai Lam

Pajau Media

September 18, 2025

Chihpwi ginra hpe KIA pawng hpawm hpung ni zing madu la ngut ai hpang ginra kata KIO PSJ komiti ni woi awn ai kata PJS magam bungli hpe n-gun dat galaw wa ai hta Pang (2) ngu na Ka-ni dawn jasan hkam la ai hta masha marai (60) dawn jasan hkam la ngut sai lam KIO shiga ni kaw na chye lu ai.

Ka-ni dawn jasan hkam ai ni gaw law malawng ramma daw ni hte n-gun ja Wa ngan ni law ai re. KIO uphkang ai ginra kata Ka-ni nanghpam dut lu dut sha ai lam n nga hkra ya aten Ginjaw Ka-ni Nanghpam PJS komiti kaw nna woi awn ai hte ja ja ninghkap bungli shang nga dingyang re lam chye lu ai.

Jinghpaw mung kata hta Myen hpyen dap uphkang wa ai 2021 hpang daw kaw nna Lit nga ai ginra uphkang asuya kawn mung uphkang masa hpe atsawm n lu jum tek ai majaw ginra kata lagut damaya, ka-ni nanghpam manghkang ni grau law jat wa ai gaw ya aten du hkra re.

N dai hpang daw de Myitkyina ginra kata hta Ka-ni lu sha masha ni gaw lai wa lai sa law ai lam maw kaba hkan du hkra wang lu wang lang jai lang nga ai raitim lit nga ai uphkang asuya gaw ahkyak la ai lam n nga ai re.

KIO gaw Ka-ni nanghpam hpe amyu sha ni a hpyen madung hku nna gasat shamyit nga ai re hte amyu sha ni Ka-ni nanghpam tsin yam kaw na lawt lu ai amyu tai lu hkra tinang uphkang nga ai ginra hkan PJS magam bungli hpe matut n di galaw nga ai re hpe mung chye lu ai.

Chyihpwi ginra Ka-ni dawn jasan wunkat hpe lai wa sai July 16 kaw nna September shata du hkra re hte September 17 ya shani gaw wunkat yu hpawng galaw ai hta Ginra kata na Salang ni, Buga Kanu Kawa ni tsa lam shang lawm ai lam chye lu ai.

Shiga - Pyilan U