KIO Uphkang Ginra Kata Hta Expire Lu Sha Ni Hpe Laning Mi Hta 2 Lang Jep Joi Ai Lam Galaw Nga

Pajau Media

September 12, 2025

Jinghpaw Mung KIO uphkang ai ginra ni hta Mung shawa hkam ja lam hpe madung tawn nna ginra kata dut lu dut sha nga ai malu sha gat rai ni hta aten lai (Expire date) ai lu sha ni hpe mari sha ai lam n nga hkra KIO kawn lit la nna jasan ai lam ni galaw nga ai re hpe chye lu ai.

Aten lai lu sha jep joi jasan ai lam hpe KIO uphkang nga ai ginjaw ginra sha n-ga ginwang ginjaw hkan mung n dai magam bungli hpe woi awn galaw nga ai re. Aten lai lu sha jep joi ai lam hpe shata 6 hta kalang laning mi kaw lahkawng galaw nga ai re hpe chye lu ai.

 Aten lai lu sha jep joi ai lam hpe mare uphkang salang ni woi awn galaw ai hta hkam ja lam magam gun ni hte balik magam gun ni, municipal magam ni mung shang lawm ai re nna Mung masha ni hpe ning mu jahpaw nna aten lai lu sha jep joi ai magam bungli ni hpe galaw ai re lam chye lu ai.

Jep joi ngut sai aten lai lu sha ni hpe wan nat jahten ai lam ni galaw ai re. N dai magam bungli hpe lai wa sai September 8 ya shani Hka Hku Mung N-gumla ginra hta mung galaw ai re hte KIO uphkang ginra kata hta n dai magam bungli hpe dingyang galaw nga ai re hpe mung chye lu ai.

Shiga - Pyilan U