KIO Uphkang Ginra Kata KTV/Bar Pyaw Chyai Seng Ni Yawng Pat Na Matu Matsun Wa Ai Lam

Pajau Media

June 27.2025

KIA Masat (9) Dap Ba ginra Hpakant ginra kata KTV hte DJ Bar Seng kaji kaba yawng hpe aten n masat pat kau na matu Matsun n dau laika shapraw wa ai re hpe chye lu ai.

N dau laika hpe June 26 ya shani n dau shabra ai rai nna KTV, DJ Bar ni hta asak ram ai ramma ni, asak naw ram ai Dinghku num/ La sha n-ga Hpaga galaw nga ai ni Nang hpam lu sha sha nna prat ni hten za ai lam law wa ai majaw aten n masat pat kau na matu n dau wa ai re lam chye lu ai.

Dai zawn sha Sinpraw ginwang ginjaw ginra Mai Ja Yang Muklum kaw mung June 24 ya shani kaw nna KTV seng kaji kaba yawng hpe KIO asuya sinpraw ginwang ginjaw kawn matsun wa ai re hpe mung chye lu ai.

Dai sha n-ga KIO ginjaw ginra Laiza Muklum kaw nga ai KTV seng lahkawng hte Melody Seng lahkawng ni hpe mung aten n masat pat kau na matu May 24 ya shani Laiza Muklum Uphkang rung kawn matsun wa ai re hpe chye lu ai.

KTV, DJ Bar Seng ni hta prat dep nang hpam lu sha ni rai nga ai Happy Water, E, K mying ai nang hpam lu sha ni hpe dut hpaga galaw nga ai shara langai zawn byin ai sha n-ga Lu sha jai lang ai ni law wa ai majaw ya na zawn pat kau na matu matsun wa ai re lam chye lu ai.

KIO ginjaw kaw nna Nanghpam Lu sha Pat Ja San ai lam hpe ginra Pat Ja San Komiti ni hte pawng hpawm galaw wa ai gaw lai wa sai 2014 shaning ni kaw na rai sai lam mung chye lu ai.

Shiga- Htu Seng