KIO Uphkang Ginra Kata Na Hpaji Jawng Ni Hpe Maigan Dakkasu Madang Sharin Ladat N Nan Hte Sharin Sa Wa Na Lam

Pajau Media

May 16. 2025

KIO asuya uphkang ginra kata na hpaji jawng ni hpe sharin ladat n nan galai nna GED hpaji madang hpe mung shalawm let Cambridge dakkasu na Curriculum ni hpe shalawm nna sharin sa wa na masing hpe KIO ginjaw hpaji dap kaw nna galaw hpang nga sai lam chye lu ai.

Maigan dakkasu a Frist year, Second year madang kaw nna Curriculum n kau hpe Lahta Tsang Jawng madang hta shalawm sharin lu hkra hkyen lajang nga ai lam Mai Ja Yang kaw nna jawng sara langai tsun ai.

“Dai ning gaw G-11 du hkra lu hpaw ai, G-12 hpe gaw hpang shaning she lu hpaw na re, lahta jawng madang sharin ladat n nan hta American hte Europe Mungdan hkan na dakkasu jawng Frist year Second year laika n kau hpe G-11, 12 ni hkan shalawm da sai. Ma ni maigan jawng de matut sa wa ai lam ningpawt ninghpang lu na matu yaw shada nna galaw sa wa ai lam re,” nga nna tsun ai .

Ya aten KIO asuya jawng ni hta G-11 du hkra sha naw lu hpaw ai re hte Tsang 11, 12 hkan gaw maigan dakkasu hpaji madang ni hte sharin sa wa na matu galaw da ai re hpe mung chye lu ai.

G-12 hpe du wa na 2026-2027 hpaji ladaw hkan gaw lu hpaw hkra galaw sa wa na hte sharin ladat n nan galaw wa ai hta KIO ginjaw hpaji fap a npu hta KSCU hte Mai Ja Yang Institute of Education (MIED) dakkasu jawng ni hte ta gindun galaw sa wa na re lam chye lu ai.

Tsang 10 du hkra lahta tsang hpaji masa hta Jinghpaw, Myen, English, Sawn hpan, Hpung Tang hpaji ginhpan, shinggyim masa hte seng ai Ginhpan (6) hpe ya aten du hkra sharin nga ai re.

Bai galaw sa wa na sharin ladat n nan hta gaw shinggyim masa ngu ai kata kaw, Eco, Geo, History, Civic ni lawm ai rai nna Life Science, earth Science, Physic hte Chemistry ni mung lawm ai re.

N dai hpaji sharin ladat ni hpe lai wa sai shaning ni hkan na galaw jai lang magang sai raitim dai aten hta G-10 du hkra sha lu hpaw ai re hte dai ning kaw nna gaw G-11 hpe hpaw hpang nna jai lang hpang nga sai re hpe mung chye lu ai. KIO uphkang ginra kata hpaji sharin ladat n nan ni hpe KIO laksan uphkang ginra ni rai nga ai Mai Ja Yang, Laiza ginra sha n-ga 2024 march 7 ya kaw nna htim gasat zing madu la sai ginra ni hkan du hkra n dai sharin ladat n nan hpe lang sa wa na re lam mung chye lu ai.

Shiga- Hpring