Lai Za Ginra De Drone Bawm (2) Lang Wa Jahkrat Ai Lam

Pajau Media

September 22, 2025

KIA ginjaw ginra hta lai wa Sep 21 ya shani Myen hpyen dap a si hkam Drone bawm lahkawng lang wa gap gasat ai lam ginra masha ni kaw na chye lu ai.

Ginra masha ni tsun ai hta lai wa sai shani shana daw hkying 3 aten daram hta kalang, shana hkying 11 jan hta kalang si hkam Drone bawm wa gap gasat ai rai nna n sen grai ngoi na ai lam ginra masha ni tsun ai re.

Ginra masha n kau tsun ai hta Myitkyina Hotel hpang maga de wa hkrat ai lam tsun ai raitim shara tup hkrak gaw n chye lu ai lam, masha hkra hkala nga n nga hpe atsawm n lu tsun ai lam chye lu ai.

Laiza Muklum hta lai wa sai January hte February shata ni hta mung si hkam drone bawm gasat hkrum ai lam nga sai re hpe mung chye lu ai.

Ya aten Manmaw Hpakant hte Waimaw ginra ni hta mung gasat gala majan matut manoi byin nga ai sha n-ga KIA htim gasat zing madu da ai Saw Law muklum hta mung September 19 ya hpang daw kaw nna gasat gala majan bai byin ai lam chye lu ai.

Shiga - Htu Seng