LaiZa Muklum Marang Matut Manoi Htu Sawng Ai Majaw Hka Bai Kaba Nga Ai Lam

Pajau Media

August 11, 2025

Marang matut manoi htu sawng ai majaw Laiza hka shawoi shaning na hta grau kaba ai hte Muklum kata hka shang ai majaw hkawm sa hkawm wa yak hkak nga ai re lam Laiza ginra masha tsun ai.

"Laiza de marang chyu htu na Jan n mu ai pyi shata mi daram rai sai, tim grai sawng hkra kaba wa ai gaw ya hte na bat kaw na rai sai, n dai bat mi gaw marang sawng dik re, dai hpawt hkying shi daram kaw nna gaw Woi Chyai maga de na Bum hka kaba wa di lamu ga nem ai daw hkan Hka lim taw, hkawm sa hkawm wa yak nga ai" nga nna Laiza ginra masha tsun ai re.

Laiza Hka gaw Miwa jarit hka re hte bum hkan na hka-shi ni grai zup ai re majaw marang htu sawng yang kajawng kaja kaba wa chye ai Hka re. Ya aten Woi Chyai, Hka Jang Lawk, Laiza Lawk 3, 5 hkan gaw hka du shang nna lai wa lai sa pyi yak nga ai re hpe chye lu ai.

Lai wa sai Aug 4 ya jahpawt daw hta mung marang ladu lai htu sawng ai majaw Je Yang hka tung kaba wa nna Mung masha htinggaw 400 hkawt Hka hpyen hkrum mat ai hte asak si sum ai Mung masha marai 6 nga sai hte hkrun lam mahkrai ni grai hten mat sai re.

Ya aten Ginjaw ginra kata Hka hpyen a majaw hten za nga ai hkrun lam mahkrai ni hpe bai gaw gap nga ai aten re hte Marang gaw matut manoi naw htu sawng nga ai re majaw Hka hpyen sadi maja ra ai masa naw re lam chye lu ai.

Shiga-Pyilan U