Laknak Kaba Gap Shadam Ai Majaw Hpakant Ginra Hta Masha Si Hkala Jahkring Hkring Byin Ai Lam

Pajau Media

September 18, 2025

Hpakant ginra Seng Tawng mare kaw Myen hpyen dap kawn gap dat ai 120 MM ngu maram lu ai Laknak kaba a majaw asak (9) ning re ai amyu shayi langai asak si sum nna asak (70) ning dinggai langai hte Ma marai (3) gaw hkala sawng ai lam chye lu ai.

“Dai ni shana daw hkying 4 daram kaw Seng Tawng, shawng de Kaung San mare sa lam lahta Maw Shan Bum lam lapran maga wa hkrat ai, Ma 3 hte dinggai langai hkra hkala ai, Ma langai gaw kalang ta asak si sum mat ai, ngam ai lahkawng hte ah dwi dinggai gaw hkala ningma sawng ai” nga nna ginra masha tsun ai .

September 17 ya jahpawt daw hkying (9) hta mung Sharaw Hka RC nawku jawng makau kaw laknak kaba wa hkrat ai majaw Mung masha langai asak si sum ai lam dai ginra masha ni tsun ai re.

Dai shani hkying 10 jan aten hta mung Hpakant Maw Wan lawk, Min Min Kyaw cycle gashin seng makau lam jut kaw myen hpyen dap kawn la langai hpe sinat gap sat da ai lam chye lu ai. Dai shani hkying 11 aten daram hta Hpakant San Chyoi Gawdin pa gat yan makau kaw La langai gaw myen hpyen dap hpung ni shang wa ai hte ang ai majaw sinat hte gap mat ai lam mung chye lu ai.

September 17 ya shani ka-ang aten daram hta gaw Hpakant San Chyoi mare hpe myen hpyen dap maga na madu kau sai lam ginra masha ni tsun ai, dai lani mi hta sha Hpakant ginra kata Mung masha marai 4 asak si sum nna marai 6 du hkra hkala hkrum ai lam chye lu ai.

September 16 ya shani hta mung Aye Mya Tar Yar gat makau de laknak kaba wa hkrat ai majaw Ma kaji langai hkra hkala ai lam nga ai, Hpakant Byuha kawng hta dap jung ai myen hpyen dap hpung ni gaw gasat gala n nga tim Muklum makau grup yin de laknak kaba hte drone ni gap ai lam shani shagu galaw nga ai re lam chye lu ai.

Shiga - Kachin Pyi Tar