Lam Langai Hpe Gwi Gwi Dawdan Na Aten Du Sai Lam Ramma Ni Hpe Du Kaba Sumlut Gun Maw Tsun Sadi Jaw Ai Lam

Pajau Media Channel

21st March, 2024

Myen mungdan kata Myen hpyen dap gaw asak ram ai mungdan masha shagu hpyen magam gun na matu tara shagrin dat ai hpang dum nta di di wa shaga ai ladat hte galaw wa ai rai nna Jinghpaw Mung ginra shara law law hta mung March shata ka-ang daram kaw nna nta de laika shadu wa sai re majaw ramma ni lam langai hpe gwi gwi dawdan na matu aten rai sai nga nna KIO ningbaw malai (2) Dkb Sumlut Gun Maw shi a dinghkrai Facebook laika man kaw nna tsun shadum ndau ai lam galaw wa ai re.

Gara lam de hkawm na ngu ai Gabaw kata “Myen hpyen dap a hpyen la n galaw n mai tara upadi shagrin dat ai n htoi (40) ya rai sai. Nta kaw sha nga (shinggan npru) jang hpa nra na re ngu myit ai ni grai law ai hpe maram lu ai. Ya gaw nta de laika shadu (shaga) nna sa woi la nga sai hpe mu lu ai. Dawdan ra ai hpe lawan n dawdan jang sharai n mai ai hkrun lam hta (myit malai hpang hkrat let) hkawm sa ra na hpe myit dum ga law” nga nna tara shang asak ram ai ramma ni hpe tsun shadum wa ai re.

Myen hpyen dap gaw mungdan masha shagu hpyen magam n gun n mai ngu ai tara upadi hpe lai wa sai Feb (10) ya shani n dau wa ai hpang ta tut hkrang shapraw galaw hpang nga sai re hpe mung chye lu ai. Jinghpaw mung daw ginra kata Myitkyina, Mohnyin, Manmaw, Putao ginra na lawk n kau hta nta di di shaga laika ni shadu nga sai hte lawu myen mung ga na ginra n kau hta mung ndai ladat hte bungli shang hpang nga sai lam shiga ni hta tang madun da ai kaw na chye lu ai.