Lam Lapran Chyat Nga Ai Mawdaw Ni Hpe Myen Hpyen Dap Kawn Nbungli Bawm Jahkrat Ai Majaw Mung Masha Hkra Hkala Ai lam

Pajau media

December 17, 2025

Myitkyina -Shwebu u lam ntsa chyat nga ai hkrun lam hkawm mawdaw ni hpe Myen Hpyen Dap kawn nbungli bawm jahkrat ai majaw mung masha hkra hkala asak si sum ai lam mawdaw la ni kaw na chye lu ai.

 Ndai laman chyat nga ai mawdaw ni hpe myen hpyen dap kawn n bungli bawm wa jahkrat bun ai majaw mawdaw hten mat ai lam nga ai, mung masha mung hkra hkala asak si sum ai lawm ai nga nna mawdaw la langai tsun ai re.

Myen hpyen dap gaw December 16 ya shani Shwebu ginra dingda daw maga na Ma-U mare hte Ywar Tit Kung mare makau kaw chyat nga ai hkrun lam hkawm mawdaw ni hpe n bungli bawm jahkrat gasat ai re hpe chye lu ai.

Myen hpyen dap nbungli bawm gap gasat ai majaw hkrun lam hkawm mawdaw ni hten za mat ai sha n-ga mung masha asak hkra hkala ai lam hte Wetlet information Network kawn Tsun da ai hta Shwebu ginra hpe hkying hkum mi laman nbungli htim gasat ai lam 18 lang galaw ai lam n dau da ai re.

Myen Hpyen Dap gaw Myitkyina-Shwebu mawdaw lam kaw naw pat da ai re majaw mawdaw lam hku na hkrun lam hkawm ai lam n galaw shi ga nga nna mawdaw la ni tsun da ai re.

Shiga - Hpring