Lam Pat Ai Majaw Dai Ning Gaw Shau Gaw Nlu Dut Sha Ai Lam Sinpraw Hkran Ginra Masha Ni Tsun Ai Lam

Pajau media

February 20, 2026

Jinghpaw mung kata majan gaw grau grau laja nga ai hte Putao ginra Sinpraw hkran hkawm sa hkrun lam mung naw pat da ai majaw ginra masha ni shaning shagu dut sha nga ai Shau Gaw Si ni mung dai ning gaw n lu dut shalai mat sai lam tsun ai re.

“ Lam pat mat ai majaw yak ai masa lam gaw law law re, raitim ahkyak gaw hku hku nga ai hta N-gu ni mari na lam pat mat ai, Shau Gaw ni, anhte kanbau bungli hku galaw sha ai ni gaw n mai htaw shalai ai madang rai nga ga ai, Shau Gaw ni hpe gaw shawoi shaning nga yng shata man 12 nga yang yawng htaw shalai dut sha ai re, dai ning gaw February shata pyi rai sai, ya du hkra n lu htaw shalai la” nga nna ginra masha langai tsun ai re.

Ginra masha ni gaw Shau Gaw hpe kaji kajaw shang gumhpraw hku galaw nga ma ai re hte nlu dut sha mat ai re hpe mung chye lu ai. Shau Gaw hpe laning mi daram gaw mai tawn da ai raitim dai ginra masha ni gaw daining galaw ai hpe laning mi tup dum nta kaw ra ai lam hpe bai jai lang ai re majaw laning mi n lu dut shalai la yang sum machyi ai lam ni byin nga ai re hpe mung chye lu ai.

Bum yi galaw na kan bau ai re hte laning hte laning Mam pru shadang ni mung grai yawm wa ai re, lai wa sai shaning gaw Yu sha ai majaw malu masha grai yak ai ni mung law law re. Malu masha grai yak ai ni hpe gaw Shanglawt asuya kaw nna loi li garum jaw ai lam ni mung nga ai lam ginra masha ni tsun ai kaw na chye lu ai.

Dai ginra hta gasat gala majan grai laja lana byin ai lam gaw n nga shi ai raitim Machyang baw hte Htang Ga ginra lai du hkra Myen hpyen dap shara la shamu shamawt nga ai re majaw aten n tam gasat gala majan sawng wa na hpe ginra masha ni myit tsang nga ma ai re. Sinpraw hkran hkawm sa hkrun lam pat da ai shata 4 daram na wa sai re hpe mung chye lu ai.

Shiga – Pyilan U