Lanam Ladaw Hkali Hkawaw Tukkwi Hte Covid-19 Ana Mung Du Hkra Ladaw A Majaw Byin Chye Ai Ana Hpan Zawn Sha Kap Bra Nga Ai Re Majaw Sadi Maja Na Matu Myen Mung Hkam Ja Lam Hkringmang Rung Kawn Ndau

Pajau Media

June 6, 2025

Lanam ladaw hta Hkali machyi ai ni, n sa sa lam hte seng ai ana ni byin law ai hte Covid-19 ana zinli hpan kaw lawm ai ana ni mung du hkra ladaw hta byin chye ai ana hpan zawn sha kap bra nga ai re majaw sadi maja nna tau hkrau makawp maga ai lam ni galaw ra ai lam Myen mung hkam ja lam hkringmang rung kawn ndau da ai re.

Ya aten Myen mungdan kata covid -19 ana hpan a majaw masha asak si sum ai lam ni gaw n nga ai raitim dai ana hpan gaw du hkra ladaw hta hkan nna byin chye ai ana hpan hku na sha kap bra nga ai re majaw Covid ana makawp maga ai hkrang hte hkrak makawp maga ra ai lam tsun hpaji jaw da ai re.

Lanam shang wa ai hte marang ladu lai htu sawng ai majaw Jinghpaw mung ginra n kau hte Mali Hka mayan hpyen koi yen ai mung masha ni hka hpyen tsin yam hkrum sha ai hte ya aten Hkali Hkawaw Tukkwi machyi ai masha ni law ai lam Waimaw Manwin hpyen yen mung masha langai tsun ai re.

“Ya aten Waimaw Manwin Dinggum Yang kaw camp masum nga ai re, lanam ta re na kun masha kaji kaba yawng machyi, n dai laman machyi ai grai law taw ai law anhte camp sha re kun masha ni hkan gaw gara hku kun n chye sai,” nga nna Waimaw Dinggum Yang hpyen yen mung masha langai tsun ai re.

Ya aten machyi makaw byin law ai hpyen yen dabang ni gaw Waimaw Manwin Dinggum Yang kaw nga ai Hkanan Camp ni, Mukchyik camp, Woi Ba camp ni hta re. Dai hpyen yen dabang ni hta ya aten tsi mawan ni mung ra kadawn nga ai hte Tukkwi ana hpe atsawm tsi gawn lajang ai lam n nga yang Hkali baw nu de shang ai ni byin chye ai re majaw grai myit tsang ra ai re.

Ye aten hpyen koi yen dabang ni hta tsi mawan hte malu masha kaw na kawt tinang dinghku tinang lit la na tam sha nga ai masa re hpe mung chye lu ai. Gasat gala majan a majaw ya aten Myitkyina Hpakant lam mayan na mung masha n kau gaw lanam ladaw machyi makaw, malu masha ni yak hkak wa na hpe myit tsang ai majaw nam kaw na pru le wa ai ni nga ai zawn ya aten du hkra nam hkan koi yen hkawm nga ai ni nga ai re hpe chye lu ai.

Ya aten Jinghpaw mung kata gasat gala majan mung grai laja nga ai re hte maren nam de hpyen koi yen hkawm ai mung masha ni law law nga ai hta Phone matut mahkai mayak a majaw hpyen koi yen mung masha ni hte seng nna san sagawn la na matu yak hkak nga ai masa re hpe mung chye lu ai.

Shiga – Pyilan U