Lanam Ta Marang Htu Sawng Ai Majaw Hten Za Nga ai Hkawng Lang Hpu Lam Atsawm N lu Gram Sharai Shi Ai Lam

Pajau Media

November 6.2025

Lai wa sai May shata htum daram hta marang htu sawng ai majaw Hkawng Lang Hpu hte Nawng Mung ginra matut da ai hkrun lam hten za mat ai hpang atsawm n lu gram sharai shi ai majaw ginra masha ni yak hkak nga ai re hpe chye lu ai.

Grau nna gaw Lanam ladaw marang htu sawng, Hka kaba ai majaw Hkawng Lang Hpu ginra Ri Dam mare kaw na Jawng Asawng Hka hta lawm mat ai re hte Ma ni a matu Laika sharin shara bai gaw gap la lu na matu gunrai htaw shalai la lam ni grai yak nga ai lam mung chye lu ai.

Hten za mat ai Jawng Asawng hpe ngang kang ai hku gap la na matu gunrai htaw shalai la yak nga ai majaw Ma ni laika sharin shara gan gaw gap ya ai lam hpe n dai shata laman hta galaw sa wa na re lam mung chye lu ai.

Jawng Asawng Hka kaw lawm mat ai hpang Ri Dam mare kata na jawngma marai 60 jan hpe Nawku Jawng, Tsi Jaw gawk hkan mai byin ai hku laika sharin ya nga ma ai re hpe mung chye lu ai.

Hkawng Lang Hpu hte Ri Dam mare lapran mai hkawm ai raitim Nawng Mung, Putao, Ri Dam mare lapran hten za taw ai lam hpe n lu gram sharai shi ai hte ya aten cycle lam hku sha madung lai hkawm nga ma ai re hpe chye lu ai.

Hkawng Lam Hpu ginra gaw hkrun lam galu ai hte lam shagu grai yak hkak ai ginra re sha n-ga Mawdaw hkrun lam mai hkawm sa ai kade n na shi ai rai nna Lanam ladaw marang htu sawng yang ya na zawn hkrun lam jahkring hkring hten za ai re hpe mung chye lu ai.

Shiga - Pyilan U