Lanam Ta Marang Htu Sawng Ai Majaw Htenza Ai Mai Ja Yang Laiza Lam Gram Nga Ai Majaw Hkawm Sa Aten Masat Kau Ai Lam

Pajau Media

January 7, 2026

Mai Ja Yang muklum hte Dum Bung Hka lapran lanam ladaw marang htu sawng ai majaw htenza mat ai lam hpe concrete lam galaw nga sai re majaw mungshawa hkawm sa hkawm wa galaw na aten hpe masat da ai aten hta galaw na matu mahkrai gawgap makan dap kaw nna ndau da ai lam nga ai re hpe chye lu ai.

N dau laika hta January praw (6) ya shani kaw nna hpang sai rai nna hkawm sa hkawm wa mawdaw ni gaw jahpawt 10:30 kaw nna 11:30 du hkra hte shana daw 4:30 kaw nna 6:30 laman sha lai hkawm sa ahkang masat da ai lam tsun da ai re hpe chye lu ai.

Dai sha n-ga leng (10) mawdaw kaba hte leng (12) mawdaw kaba ni hpe gaw lai wa lai sa ahkang pat hkum da ai lam, leng (4) mawdaw ,leng (6) mawdaw ni hpe gaw shana 7:00 kaw nna 11:00 lapran hkawm sa ahkang masat da ai lam chye lu ai.

Ya na zawn aten masat pat hkum da ai lam hpe mungshawa kaji kaba yawng chye na hkan sa na matu hte hkawm sa ahkang pat da ai mawdaw kaba ni hpe lit nga ai rung kaw nna ahkang jaw yang sha mai hkawm na re lam tsun da ai re.

Dai hkrun lam gaw lai wa sai 2025 August shata 4 ya hta byin ai hka maw ru a majaw hten za mat ai hkrun lam re hpe mung chye lu ai.

Shiga - Pyilan U