Lang Se De Nbungli Bawm Bai Wa Jahkrat Ai Majaw Mung Masha Asak Si Sum Ai Lam

Pajau Media

October 11, 2025

Jinghpaw Mung Chihpwi Saw Law ginra na Lang Se mare kaw Myen hpyen dap Nbungli bawm wa jahkrat ai majaw Mung masha 1 Asak si sum nna Marai 3 hkala ai lam chye lu ai.

October 10 ya shana daw hkying 3:20 aten daram hta Myitkyina Kaw na lung wa ai Y-12 Nbungli gaw Lang Se Mare de bawm 4 lang wa jahkrat ai majaw Mung masha 1 asak si sum nna Marai 3 gaw hkala hkrum ai hte Dum n ta 2 hten za mat ai lam chye lu ai.

Asak si sum ai wa gaw Slg Maran Zau La asak 40 ning daram nga nna Sam Mung kaw na re lam, Man Je ginra masha Slg Maw Maw asak 46 ning, Myitkyina Dap kawng Lawk kaw na Slg Htoi Nan Li Aung asak 28 ning, hte Htaw Law mare kaw na Slg La Garawng Dau San asak 33 ning hkala hkrum ai re.

Ya aten Lang Se mare makau grup yin hkan gasat gala majan n nga ai rai nna Mung masha hpe masat shingte tawn gap gasat ai re lam, dai ngut ai hpang Waimaw Lamyang ginra maga de bai wa gap ai re lam chye lu ai.

Lang Se Ginra de lai wa sai September 22 ya shani hta mung Myen hpyen dap Nbungli wa gap ai majaw Mung masha marai 3 asak si sum nna marai 4 hkala hkrum ai lam chye lu ai.

Shiga - Htu Seng