Lang Se Ginra Ja Maw Pat Da Ai Raitim Bungli Madu N Kau Mi Matut Manoi Naw Htu Sha Nga

Pajau Media

9 May 2025

Jinghpaw mung Chihpwi ginwang, Saw Law Lang Se ginra kata ja htu sha ai lam hpe KIO Asuya kaw nna tara shang pat da ai raitim ja htu ai bungli lauban n kau gaw matut manoi htu sha nga ai lam Lang Se ginra masha ni tsun ai kaw na chye lu ai.

“Ya n dai kaw Asuya gaw ja htu sha ahkang hpe tara shang pat da ai raitim ginra masha n kau hte ja htu lauban ni gaw matut manoi galaw nga dingyang re,” nga nna Lang Se ginra masha tsun ai re.

Lang Se ginra hpe KIA hte KPDF pawnghpawm hpung ni kawn 2024 November 11 ya shani htim gasat zing madu la lu ai hpang KIA kawn January kaw nna Lang Se ja maw hpe aten n masat pat da ai re hpe chye lu ai.

Ya aten Lang Se ja maw hpe KIO Asuya uphkang ai n pu kawn pat da ai raitim ginra masha n kau hte ja htu lauban n kau gaw bungli matut manoi shang nga dingyang re hpe mung chye lu ai.

“Ya aten KIO Asuya gaw ja htu sha ahkang pat da ai raitim Miwa hte Wa labau ni hpe gaw galaw sha ahkang jaw da ai, dai majaw n kau ginra masha ni gaw dai kaw shani bungli n chyang sa chyang sha ai hku nna galaw nga ma ai,” nga nna mung tsun ai re.

Girna masha n kau gaw KIO kawn ja htu sha ahkang jaw da ai Miwa hte Wa bungli madu ni a bungli dabang ni hkan bungli shang galaw let kan bau nga ma ai re. Lang Se ginra gaw hkrun lam matut mahkai yak hkak nna Myo mare kaba hte mung tsan ai shara re majaw ginra masha ni gaw hkai lu hkai sha n mai ai majaw ja htu ai bungli hte sha kan bau nga ma ai re hpe mung chye lu ai.

Shiga- Hpring