Langse Gira De Gasat Gala Matut Manoi Byin Ai 4 Ya Daram Rai Sai Hte Nbungli Wa Gap Ai Majaw Masha Asak Si Sum Ai Lam Nga

Pajau Media

September 22, 2025

Lang Se ginra de September 22 ya du hkra 4 ya daram matut manoi gasat gala byin ai rai nna September 22 ya shana daw hkying 2 jan aten daram hta Jet Fighter nbungli hte wa gap ai hta masha asak si sum ai lam nga ai re hpe chye lu ai.

Jinghpaw Mung Chihpwi ginra, Saw Law, Lang Se ginra de dai ni du hkra KIA pawng hpawm hpung ni hte Myen hpyen dap, P.T.Ts pawng hpawm hpung ni gasat gala majan laja nga dingyang re hpe chye lu ai. Dai hta Jet Fighter hte wa gap ai majaw yawm htum masha 2 daram asak si sum ai lam, hkala hkrum ai lam gaw tup hkrak n chye lu ai re.

September 19 ya kaw nna KIA pawng hpawm hpung ni hte Hkawng Lang Hpu P.T.Ts pawng hpawm hpung ni htu shadut htim gasat wa ai gaw ya aten du hkra re. Dai zawn sha Lang Se ginra sha n-ga Waimaw Lamyang de mung dai hpawt jau kaw nna laknak kaba gap ai lam galaw ai re hpe chye lu ai.

Myen hpyen dap gaw Hpakant, Waimaw, Manmaw ginra de hpyen n-gun jat htu shadut nna matut manoi htim gasat ai sha n-ga nbungli, drone, laknak kaba ni hte shani shagu gap nga ai majaw ginra masha ni si hkala hkrum ai lam nga ai re hte gasat gala majan gaw grau grau laja wa ai re lam ginra masha ni tsun ai.

Myen hpyen dap hte SNA pawng hpawm dap ni shara la nga ai Sagaing ginra kaw na Bamauk muklum hpe mung September 20 ya shana daw hkying 6 jan aten hta KIA, PDF pawng hpawm hpung ni htim gasat zing la sai re hpe chye lu ai.

Tat sum kau ai shara law wa ai majaw KIO ginjaw ginra Laiza muklum de myen hpyen dap kawn September 21 ya shani drone bawm lahkawng lang wa jahkrat gasat ai lam nga ai raitim masha si hkala ai lam n nga ai re hpe matut chye lu ai.

Lang Se ginra hpe lai wa sai 2024 November 10 ya hta KIA pawng hpawm hpung ni htim gasat zing madu da lu sai rai nna dai ginra Myen hpyen dap, P.T.Ts pawng hpawm hpung ni htu shadut htim gasat wa ai majaw majan byin nga ai lam chye lu ai.

Shiga- Htu Seng