Laning Mi Laman Jinghpaw Mung Kaw Ma Kaji 7 Hte Amyu Shayi Marai 10 Du Hkra Asak Si Sum Ai Lam

Pajau Media

20 January 2026

Myen Hpyen Dap a gumshem ai hku htim gasat ai majaw Jinghpaw Mung kata laning mi laman ma kaji marai (7 ) hte amyu shayi marai (10) du hkra asak si sum ai lam Kachin Human Rights Watch (KHRW) kawn ndau da ai re hpe chye lu ai.

Lai wa sai 2025 laning mi laman Myen Hpyen Dap a gumshem ai hku htim gasat ai majaw mung masha marai (133) asak si sum lai wa sai rai nna (177) du hkra hkala hkrum ai hte dai asak si sum ai lam hta ma kaji marai (7) mung lawm ai hte amyu shayi marai (10) du hkra nga ai lam chye lu ai.

Dai sha n-ga AAPP kawn ndau da ai hta laning mi laman Myen Hpyen Dap a nbungli, drone, laknak kaba gap ai majaw asak 18 ning n pu ma marai 45 du hkra asak si sum ai lam chye lu ai.

Myen hpyen dap gaw gasat gala majan byin ai shara ni hkan lagaw lam hpyen n-gun htu shadut ai lam nbungli, drone, laknak kaba ni gap sharu bun ai lam ni matut manoi galaw nga ai re hpe chye lu ai.

Shiga- Hpring